Wararka24: Ciidamo ka tirsan kuwa deegaanka ee loo yaqaan Macawiisleyda, kuwaas oo watay gaadiidka dagaalka, ayaa la wareegay qaybo ka mid ah xerada Lama-galay ee magaalada Beledweyne, xarun muhiim u ah maamulka gobolka Hiiraan iyo ciidamada dowladda Federaalka Soomaaliya.
Ciidamadan oo ay hoggaaminayeen siyaasiyiin iyo ganacsato ayaa fariisimo ka samaystay qaybo ka mid ah xerada, gaar ahaan xarumaha maamulka gobolka Hiiraan. Waxay sidoo kale la wareegeen afaafka hore ee buundada Liqliqato, halkaas oo ay ka sameysteen fariisimo.
Xerada Lama-galay waxay ka kooban tahay laba qaybood oo waaweyn. Qaybta hore waxaa ku yaalla xarunta maamulka gobolka Hiiraan, halkaas oo uu hadda degan yahay Maxamed Xuseen Maxamed, oo maamulka Hirshabeelle uu sheegay inuu xilka ka qaaday, balse diiday go’aankaas.
Qaybta kale ee xerada waxaa ku yaalla saldhigga ciidamada xoogga dalka, halkaas oo uu ku sugan yahay Muuse Salaad Weheliye, oo Hirshabeelle u magacowday guddoomiyaha cusub ee gobolka Hiiraan.
Wararka laga helayo magaalada ayaa sheegaya in ciidamada xoogga dalka ee ku sugnaa afaafka hore ee xerada ay u baneeyeen ciidamada Macawiisleyda, iyadoo aan la soo sheegin wax rasaas ah oo labada dhinac ay isweydaarsadeen.
Ciidamada deegaanka ayaa sidoo kale fariisimo ka samaystay bannaanka garoonka diyaaradaha Ugaas Khaliif iyo qaybo kale oo ka mid ah magaalada Beledweyne.
Dhaqdhaqaaqan ayaa yimid kaddib markii la shaaciyay in madaxweyne ku xigeenka Hirshabeelle, Cabdifataax Xasan Afrax, iyo wafdi uu hoggaaminayo ay Jimcihii imaanayaan magaalada Beledweyne.
Guddoomiyihii hore ee degmada Maxaas, Muumin Maxamed Xalane, ayaa sheegay in ciidamadoodu aysan weerar ku ahayn ciidamada xoogga dalka, balse ay doonayaan inay la wareegaan xarumaha maamulka gobolka Hiiraan.
Wuxuu saraakiisha ciidamada xoogga dalka iyo kuwa nabad-sugidda ugu baaqay inaysan faragelin ku sameyn dhaqdhaqaaqooda, isaga oo sheegay inay iska difaaci doonaan haddii la soo weeraro.
Xaaladda magaalada Beledweyne ayaa la sheegay inay hadda deggan tahay, hase yeeshee dhaqdhaqaaqa ciidamada iyo muranka ka taagan maamulka gobolka Hiiraan ayaa abuuray walaac ku saabsan sida uu ku dambeyn doono khilaafka u dhexeeya dhinacyada.
