Wararka24: Taliska Ciidanka Booliska Puntland ayaa la sheegay inuu shaqada ka joojiyay Taliyaha Qaybta Booliska Gobolka Mudug, Gaashaanle Sare Maxamuud Muuse Bille (Fardafuul), kaddib dhacdadii baxsashada maxaabiis loo haystay burcad-badeednimo oo lagu qabtay howlgalkii lagu soo furtay markabka SIBU 1.
Wararka la helayo ayaa sheegaya in si ku-meel-gaar ah xilka loogu dhiibay ku-xigeenkiisa, Gaashaanle Ayuub Siciid Cali (Dheeg), kaas oo hadda sii wada howlaha Taliyaha Qaybta Booliska Gobolka Mudug. Magacaabista Ayuub ayaa horey uga mid ahayd isbeddelladii lagu sameeyay hoggaanka qaybaha Booliska Puntland.
Dhacdada baxsashada ayaa la sheegay inay dhacday 26-kii September, xilli maxaabiis laga soo qaaday deegaanka Garacad loo waday gudaha Puntland. Sida ay qortay Puntland Post, ku dhowaad 20 maxbuus ayaa ka baxsaday gacanta ciidamada, waxaana goobta ka dhacay iska horimaad sababay dhimashada mid ka mid ah maxaabiista iyo dhaawaca mid kale.
Maxaabiista ayaa ka mid ahaa koox lagu qabtay howlgalkii lagu soo furtay markabka SIBU 1, oo ay koox burcad-badeed ah afduubatay bishii Agoosto. Puntland ayaa sheegtay in howlgalkii lagu soo furtay markabka lagu qabtay dad looga shakisan yahay inay ku lug lahaayeen afduubka, iyadoo tirada maxaabiista ay ilo kala duwan ku sheegeen tirooyin kala duwan.
Dhacdada baxsashada ayaa dhalisay su’aalo ku saabsan habka loo sugayay amniga maxaabiista iyo masuuliyadda saraakiisha gacanta ku haysay. Haddii shaqo-joojinta taliyaha Mudug ay si rasmi ah ugu xirnaato dhacdadan, tallaabadaasi waxay noqonaysaa mid ka mid ah jawaabaha maamulka Puntland uga falcelinayo arrinta.
Dhanka kale, Puntland ayaa sii wada howlgallada ka dhanka ah burcad-badeedda, iyadoo ciidamada badda ay dhawaan dib ula wareegeen SIBU 1, halka markabka iyo shaqaalihiisa markii dambe la geeyay Boosaaso. Mas’uuliyiinta Puntland ayaa sheegay in aysan xilligaas jirin markab kale oo gacanta ugu jira kooxaha burcad-badeedda.
Si kastaba, tirada saxda ah ee maxaabiista baxsatay iyo faahfaahinta tallaabada laga qaaday saraakiisha ku lugta lahayd dhacdada ayaa weli u baahan xaqiijin rasmi ah oo dheeraad ah. Puntland weli si faahfaahsan ugama aysan hadlin arrimahaas.
