Muqdisho – Madaxweyne Xasan Sheekh Maxamuud, ayaa xilka qabtay 15-kii May 2022, ayaa afar sano ka dib ka tegaya dhaxal siyaasadeed iyo mid dowladeed oo lagu xasuusan doono, kaas oo si toos ah u taabanaya dhinacyada dhaqaalaha, amniga, madaxbannaanida qaranka iyo kaalinta ay Soomaaliya kaga jirto caalamka.
Mudadii uu xilka hayay, Soomaaliya waxay gaartay horumar taariikhi ah oo dhinacyo badan ah, iyadoo ku tallaabsatay go’aamo waaweyn oo soo celiyay kalsoonida caalamiga ah iyo sumcadda dowladnimada.
Deyn cafin iyo dib u soo kabasho dhaqaale
Guusha ugu weyn ee dowladdiisa laga xusuusan doono waa dhammaystirka barnaamijka dayn cafinta caalamiga ah (HIPC), taas oo Soomaaliya ka saartay liiska dalalka aadka u deynta badan. Tani waxay fursad u siisay dowladda in si toos ah ula macaamisho hay’adaha maaliyadeed ee caalamka. Hay’adaha IMF iyo Bangiga Adduunka ayaa ku amaanay dowladda sida ay u hirgelisay isbeddellada maaliyadeed iyo nidaamka maamulka hantida dadweynaha.
Qaadka cunaqabatayntii hubka iyo dhisidda ciidan qaran
Kadib 30 sano oo cunaqabatayn hubka ah, Golaha Ammaanka ee Qaramada Midoobay ayaa qaaday xayiraaddii saarneyd Soomaaliya. Go’aankaasi ayaa loo arkay guul diblomaasiyadeed oo uu hormuud u ahaa Madaxweyne Xasan Sheekh, taas oo dowladda u suurtagelisay inay dib u dhisto ciidamo qaran oo casri ah. Muqdisho iyo gobollada dhexe ayaa maanta leh xaalad amni oo ka wanaagsan tii hore, iyadoo la tababaray ciidan cusub oo qalab casri ah loo sameeyay.
Ku biirista Bulshada Bariga Afrika (EAC)
Soomaaliya ayaa si rasmi ah ugu biirtay Bulshada Bariga Afrika, tallaabo fure u noqotay kor u qaadista ganacsiga, isu socodka dadka iyo maalgashiga gobolka. Ku biirista EAC ayaa loo arkaa mid xoojineysa xiriirka dhaqaale iyo siyaasadeed ee Soomaaliya iyo dalalka deriska ah.
Xirista xafiiska UNSOM iyo soo celinta madaxbannaanida siyaasadeed
Madaxweyne Xasan Sheekh ayaa xiray xafiiskii UNSOM ee Qaramada Midoobay oo muddo dheer awood ballaaran ku lahaa arrimaha gudaha Soomaaliya. Tallaabadan ayaa lagu tilmaamay calaamad muujineysa in Soomaaliya dib ula soo ceshatay madax-bannaanideeda siyaasadeed iyo awoodda ay u leedahay inay iskeed u hoggaamiso qorshaheeda amniga iyo dowlad-dhiska.
Xubinimada Golaha Ammaanka ee Qaramada Midoobay (UNSC)
Soomaaliya ayaa markii ugu horreysay taariikhdeeda ku guuleysatay kursi aan joogto ahayn oo Golaha Ammaanka ee Qaramada Midoobay. Guushan ayaa muujisay sumcadda sii kordheysa ee Soomaaliya iyo kaalinteeda cusub ee go’aamada caalamka.
Qodista shidaalka iyo maalgashiga kaabayaasha dhaqaalaha
Dowladda Xasan Sheekh ayaa bilowday qodista shidaalka badda iyo berriga, iyadoo heshiisyo la gashay shirkado caalami ah, gaar ahaan Turkey. Waxaa sidoo kale socda mashaariic ballaaran oo lagu dhisayo dekedda iyo garoonka ugu weyn Geeska Afrika, kuwaas oo lagu sheegay inay sare u qaadi doonaan awoodda dhaqaale ee dalka.
Dhismaha xarunta dayax-gacmeedka qaranka
Soomaaliya ayaa bilowday dhismaha xarunteedii ugu horreysay ee dayax-gacmeedka, taas oo lagu horumarinayo sayniska, tiknoolajiyadda iyo ilaalinta deegaanka, iyadoo mashruucaasi uu ka mid yahay iskaashiga cusub ee Soomaaliya iyo Turkey.
Dagaalka ka dhanka ah argagixisada
Kooxda Al-Shabaab oo muddo dheer dhibaato ku haysay dalka ayaa wajahday cadaadis milatari, dhaqaale iyo mid istaraatiiji ah oo ay dowladdu hoggaamineyso. Tallaabooyinkan ayaa hoos u dhigay awooddii kooxda iyo saamayntii ay ku lahayd Muqdisho iyo gobollada bartamaha.
Guulaha kale ee la taaban karo..
Dhismayaasha maamullo cusub, sameynta guddiga xuquuqul insaanka, iyo kororka miisaaniyadda qaranka ayaa lagu daray guulaha lagu xasuusan doono hoggaanka Madaxweyne Xasan Sheekh.
Afartii sano ee uu xilka hayay kadib, Soomaaliya waxay ku jirtaa marxalad isbeddel iyo kalsooni cusub, halka Xasan Sheekh uu uga tagayo dhaxal siyaasadeed iyo mid dowladeed oo lagu tilmaamay inuu saldhig u yahay dowladnimada casriga ah ee dalka.
