Wararka24: Madaxweynaha Maraykanka, Donald Trump, ayaa sheegay inuu diyaar u yahay inuu wadahadal la yeesho ururka Xisbullaah haddii Madaxweynaha Lubnaan, Joseph Aoun, uu si rasmi ah uga codsado arrintaas.
Trump ayaa hadalkan ka sheegay intii lagu jiray kulankiisii ugu horreeyay ee uu Aqalka Cad kula yeeshay Madaxweyne Joseph Aoun. Wuxuu xusay in Lubnaan muddo dheer loola dhaqmay si aan caddaalad ahayn, isagoo ballanqaaday in dalkaasi uu heli doono “ixtiraamka uu mudan yahay,” inkastoo uu sheegay inay weli taagan tahay arrinta la xiriirta Xisbullaah.
Markii saxafiyiintu weydiiyeen inuu diyaar u yahay inuu la xiriiro Xisbullaah, Trump wuxuu ku jawaabay, “Haddii Madaxweynaha Lubnaan uu iga codsado inaan la hadlo Xisbullaah, waan samayn doonaa.”
Si kastaba ha ahaatee, Madaxweynaha Maraykanka ma uusan faahfaahin nooca wadahadalka uu ula jeeday, mana uusan sheegin inay jiraan qorshayaal rasmi ah oo lagu qabanayo wada-hadallo mustaqbalka.
Dhankiisa, Madaxweyne Joseph Aoun ayaa Maraykanka ku boorriyay inuu sii wado taageerada uu siiyo ciidamada Lubnaan si loo dhammaystiro bixitaanka ciidamada Israa’iil ee koonfurta dalka, loona xoojiyo amniga iyo xasilloonida.
Aoun wuxuu sidoo kale ka digay in hakinta gargaarka Maraykanka ay dib u abuuri karto xaalado amni oo qalafsan, isagoo xusay muhiimadda ay taageerada caalamiga ahi u leedahay xasilloonida Lubnaan.
Kulankan ayaa ku soo beegmaya xilli ciidamada Lubnaan ay bilaabeen inay la wareegaan ammaanka qaar ka mid ah deegaannadii ay ciidamada Israa’iil ka baxeen, kaddib heshiis uu Maraykanku dhex dhexaadiyay oo u dhexeeyay Lubnaan iyo Israa’iil.
