Wararka24: Madaxweynaha Mareykanka Donald Trump ayaa ku dhawaaqay in Mareykanka iyo Iiraan ay gaareen heshiis xabad joojin ah oo soconaya laba toddobaad.
Ku dhawaaqistan ayaa timid wax ka yar laba saacadood ka hor waqtigii kama dambaysta ahaa ee uu Mareykanku u qabtay Iiraan inay dib u furto marinka Hormuz.
Trump ayaa sheegay in heshiiska uu ku xiran yahay in Iiraan ay oggolaato furitaanka marinkaasi oo muhiim u ah maraakiibta shidaalka iyo gaaska.
Dowladda Iiraan ayaa dhankeeda sheegtay in wadahadallo rasmi ah ay Jimcaha ka bilaaban doonaan magaalada Islamabad ee dalka Pakistan.
Wasiirka Arrimaha Dibadda Iiraan ayaa sheegay in Tehran ay joojin doonto weerarrada aargoosiga ah, isla markaana ay oggolaan doonto marin ammaan ah oo laga helo Hormuz.
Saraakiil ka tirsan Aqalka Cad ayaa sidoo kale sheegay in Israa’iil ay aqbashay xabad joojinta, islamarkaana ay joojin doonto duqeymaha ay ka wadday gudaha Iiraan.
Dagaalka u dhexeeya dhinacyadan oo galay toddobaadkiisii lixaad ayaa sababay khasaare xooggan oo naf iyo maalba leh, iyadoo kumannaan qof ay ku dhinteen.
Suuqyada caalamka ayaa si degdeg ah uga falceliyay warkan, iyadoo qiimaha shidaalka uu si weyn hoos ugu dhacay kadib ku dhawaaqista heshiiska.
