Wararka24: Siyaasiga mucaaradka Itoobiya Jawar Maxamed ayaa sheegay in isbeddelladii ugu dambeeyay ee ka dhacay magaalada Baydhaba ay muujinayaan hoos u dhac ku yimid saameyntii Itoobiya ku lahayd Soomaaliya.
Jawar ayaa arrintan ku tilmaamay guuldarro diblomaasiyadeed, isagoo xusay in bixitaanka Cabdicasiis Xasan Maxamed Lafta-gareen uu astaan u yahay isbeddelka socda.
Wuxuu sheegay in Lafta-gareen, oo loo arkayay siyaasi xiriir dhow la lahaa Addis Ababa, uu xilka baneeyay kadib markii ciidamada dowladda federaalka ay la wareegeen Baydhaba.
Jawar ayaa sidoo kale tilmaamay in ciidamada Itoobiya ee ku sugnaa magaalada aysan wax ka beddeli karin xaaladda, inkastoo hore loo sheegay inay taageero siin karaan xulafadooda.
Wuxuu intaas ku daray in dhacdadan ay muujineyso in Itoobiya ay luminayso gacan ku hayntii ay muddo dheer ku lahayd Baydhaba iyo guud ahaan Soomaaliya.
Sidoo kale, Jawar ayaa ku dooday in isbeddellada ka socda Geeska Afrika ay sii xoojinayaan saameynta dalal kale sida Turkiga iyo Masar ee gudaha Soomaaliya.
Hase yeeshee, eedeymaha qaar ee la xiriira taageero militari oo dibadda ah weli ma helin xaqiijin madax-bannaan.
Falanqeeyayaal ayaa sheegaya in xaaladda Baydhaba ay ka tarjumeyso isbeddel ballaaran oo ku saabsan awoodda siyaasadeed iyo istiraatiijiyadda gobolka.
