Wararka24: Dowlad Deegaanka Soomaalida ee Itoobiya ayaa faahfaahin ka bixisay xaaladda ciidamo ka tirsan Xoogga Dalka Soomaaliya oo galay dhulka Itoobiya, kuwaas oo hadda ay socdaan dadaallo lagu waafajinayo habraacyada sharciga iyo diblomaasiyadda ee labada dal.
Cabdulqaadir Rashiid Duaale, oo ka tirsan hoggaanka amniga deegaanka, ayaa sheegay in ciidamada ay gaareen magaalada Jigjiga kaddib markii ay ka gudbeen xuduudda Soomaaliya iyo Itoobiya. Sida uu sheegay, ciidamada ayaa ku yimid kooxo kala duwan, waxaana socda hubin lagu ogaanayo xaaladdooda iyo ujeeddada ay u safreen.
Mas’uulku wuxuu sheegay in ciidamada aysan markii ay xadka ka gudbayeen wadan dukumentiyo ku filan oo lagu xaqiijinayo ujeeddada safarkooda, taas oo keentay in arrintooda loo maro habraacyo rasmi ah. Wuxuu intaas ku daray in hay’adaha ay khuseyso ee labada dal ay ka shaqeynayaan sidii xal sharci ah looga gaari lahaa xaaladda.
Duaale ayaa sidoo kale sheegay in arrinta ay gacanta ku hayaan hay’adaha amniga iyo diblomaasiyadda ee Soomaaliya iyo Itoobiya. Wuxuu bulshada ugu baaqay inay ku ekaadaan xogta la xaqiijiyey, kana fogaadaan faafinta warar aan rasmi ahayn oo keeni kara jahawareer.
Xaaladda ciidamada ayaa soo jiitamaysay tan iyo dabayaaqadii bishii Agoosto, markii ay soo baxeen warar sheegaya in askar ka mid ahayd ciidamo tababar ku qaatay xerada Xananbuure ee gobolka Galgaduud ay u gudbeen Itoobiya. La-taliyaha Amniga Qaranka Soomaaliya, Aways Xaaji Yuusuf, ayaa horraantii Sebtembar xaqiijiyey in ciidamo Soomaaliyeed ay ku sugan yihiin Dowlad Deegaanka Soomaalida, isagoo sheegay in loo fasaxay inay booqdaan qoysaskooda.
Ciidamada ayaa ka mid ahaa askar tababar muddo dheer qaatay, waxaana tababarkooda maalgelisay dowladda Sacuudi Carabiya. Warar hore ayaa sheegay in qaar ka mid ah askarta ay gacanta u galeen ciidamada deegaanka Itoobiya, inkastoo faahfaahinta tirada iyo xaaladda dhammaan askarta aan si buuxda loo shaacin.
Wararka ugu dambeeyay ayaa tilmaamaya in Soomaaliya iyo Itoobiya ay wada-hadallo ka leeyihiin sidii loo xallin lahaa arrinta. Hase yeeshee, weli si rasmi ah looma xaqiijin in ciidamada dib loogu celin doono Soomaaliya, qaabka loo soo celinayo ama waqtiga ay dhici karto.
Labada dowladood ayaa wajahaya baahida loo qabo in si rasmi ah loo caddeeyo xaaladda askarta, iyadoo la sugayo faahfaahin dheeraad ah oo ka timaadda mas’uuliyiinta labada dhinac.
