Wararka24: Mid ka mid ah ganacsatada ku hanti beelay dabkii ka kacay Suuqa Bakaaraha aya yiri, “Sheyna iima badbaadin maanta. Waxaan waayay hanti aan aruurinayay 16 sano. Murugo ayaan dareemayaa, waxaan ahay qof ceyr-toobay,” hadalkiisa ma uusan koobnayn murugada shaqsiyadeed ee uu wajahayo. Wuxuu metelayay dareenka boqollaal ganacsato ah oo waayay hantidii ay sannado badan ku dhisayeen dadaal iyo adkaysi.
Suuqa Bakaaraha waa xarunta ugu weyn ee ganacsiga Soomaaliya, waxaana nolol maalmeedkooda ku tiirsanyahay kumannaan qoys. Ganacsatada, shaqaalaha, gaadiidleyda iyo adeeg-bixiyeyaasha ayaa dhammaantood ku xiran dhaqdhaqaaqa suuqa, taasoo ka dhigaysa in masiibo kasta oo halkaas ka dhacda ay saameyn ku yeelato qayb ballaaran oo ka mid ah dhaqaalaha dalka.
Soo noqnoqoshada dababka ka dhaca suuqyada waaweyn waxay muujinaysaa baahida loo qabo qorshe waara oo lagu yareynayo khataraha. Tallaabooyinka ay ka mid yihiin rakibidda nidaamyo casri ah oo dab-damis, waddooyin fududeeya gurmadka degdegga ah iyo tababarro joogto ah oo la xiriira badbaadada ayaa door muhiim ah ka qaadan kara.
Dowladda iyo hay’adaha ay khuseyso waxaa saaran mas’uuliyad ku aaddan qiimeynta khasaaraha, taageeridda dadka ay saameysay musiibadu iyo dejinta siyaasado lagu xoojinayo badbaadada xarumaha ganacsiga. Sidoo kale, iskaashiga ganacsatada, hay’adaha maaliyadda iyo bulshada ayaa muhiim u noqon kara dib u soo kabashada dadka ay dhibaatadu gaartay.
Dabkii Bakaaraha wuxuu muujinaya baahida loo qabo qorsheyn iyo u diyaar garow. Inkasta oo suuq dib loo dhisi karo, ilaalinta kalsoonida ganacsatada iyo adkeynta badbaadada dhaqaalaha waxay u baahan yihiin tallaabooyin joogto ah iyo iskaashi ballaaran oo looga hortago in masiibooyin la mid ah ay mar kale dhacaan
