Wararka24: Dab xooggan ayaa maanta oo Talaado ah ka kacay Suuqa Bakaaraha ee magaalada Muqdisho, oo ah xarunta ganacsi ee ugu weyn Soomaaliya. Qiiq madow ayaa laga arkayay qaybo badan oo ka mid ah caasimadda, iyadoo dabku si gaar ah u saameeyay qeybta lagu iibiyo qalabka elektarooniga.
Kooxaha Dab-demiska iyo Gurmadka Degdegga ah ee Gobolka Banaadir ayaa si degdeg ah u gaaray goobta, iyagoo muddo saacado ah ku howlanaa daminta dabka. Mas’uuliyiinta ayaa sheegay inay ku guuleysteen xakameynta dabka, taasoo ka hortagtay inuu ku fido qeybaha kale ee suuqa.
Warbaahinta dowladda ayaa sheegtay in la billaabay baaritaan lagu ogaanayo sababta rasmiga ah ee dabka dhalisay, isla markaana la qiimeynayo baaxadda khasaaraha ka dhashay. Ilaa iyo hadda lama shaacin sababta dabka keentay, sidoo kalena ma jiraan warar rasmi ah oo sheegaya khasaare nafeed.
Mid ka mid ah ganacsatada hantidooda ku waayay dabka ayaa sheegay in wixii uu soo uruurinayay muddo 16 sano ah ay ku basbeeleen dabka. Ganacsaduhu wuxuu sheegay inuu waayay dhammaan hantidiisii, isla markaana uu wajahayo khasaare weyn oo dhanka ganacsiga ah.
Suuqa Bakaaraha ayaa hore dhowr jeer u wajahday dabab sababay khasaare ballaaran oo soo gaaray ganacsatada. Dhacdadan ayaa mar kale soo nooleysay walaaca laga qabo badqabka dabka iyo baahida loo qabo in la xoojiyo tallaabooyinka ka hortagga iyo gurmadka degdegga ah ee xarumaha ganacsiga ee magaalada Muqdisho.
