Madaxweynaha Jamhuuriyadda Federaalka Soomaaliya, Xasan Sheekh Maxamuud, oo Khamiistii ku laabtay jiidaha hore ee deegaanada Hirshabelle, ayaa xalay ku hoyday Degmada Cadale ee Gobolka Shabellaha Dhexe.
Madaxweynaha ayaa degmadaasi u tegay dardargelinta hawlgalka ballaaran ee ka dhanka ah kooxaha argagixisada, gaar ahaan Al-Shabaab.
Madaxweynaha Soomaaliya ayaa Cadale ka bilaabay kulamo uu la qaadanayo siyaasiyiinta, waxgaradka, odayaasha, culimada deegaanka, iyo saraakiisha ciidamada qalabka sida iyo hoggaanka macawiisleyda.
Ilo wareedyo ayaa sheegay in Madaxweynuhu uu amar ku bixiyay in nin walba oo masuul ah uu iska xaadiriyo goobta dagaalka, dibna aan loo soo guryo noqon karin, iyadoo aan maleeshiyada Al-Shabaab laga ciribtirin Gobolka Shabellaha Dhexe.
Ilo wareedyada ayaa intaasi ku daray in Madaxweynuhu uu masuuliyiinta ka dalbaday inay wax ka hoggaamiyaan hawlgalka lagu wiiqayo Al-Shabaab.
Wararka ayaa sheegaya in Madaxweyne Xasan Sheekh uu beelaha deegaanka ku adkeynayo inaanan loo kala harin dagaalka dib-u-xoreynta, si loo soo gacan geliyo dhulka ka maqan gacanta qaranka.
Madaxweynaha Dowladda Federaalka ayaa xalay Duubabka Dhaqanka iyo siyaasiyiintaba u bandhigay in laga faa’iideysto taageerada ay haatan dowladdu diyaarka ula tahay dadka deegaanka.
Madaxweynaha ayaa xubnaha uu la kulmayo u sheegay inay keliya ka doonayaan inay iska dulqaadaan cadowga ay Villa Somalia u aragto inay dalka ku soo duuleen.
Hawlgalka Shabellaha Dhexe iyo ujeedka Madaxweyne Xasan Sheekh
Gobolka Shabellaha Dhexe ayaa waxaa ka socdo hawlgal gaar ah, kaas oo cir iyo dhulba lagu la dagaalamayo maleeshiyada Al-Shabaab. Hawlgalka gobolkan ayaa hadda laf dhabar u ah dagaalka ay dowladdu dooneyso inay kaga adkaato maleeshiyadaasi.
Hawlgal midkani barbar socda ayuu qorshuhu yahay in si dhakhsa ah looga bilaabo Gobolka Hiiraan, iyadoo markaasi dagaal buuxa la gelinayo maleeshiyada ku sugan deegaanada Hirshabelle.
Hawlgalkan ayaa qayb ka ah wejiga labaad ee hawlgalka dib-u-xoreynta dalka, kaas oo ujeedkiisu yahay in Al-Shabaab lagaga saaro deegaanada Hirshabelle, si la mid ahna looga kiciyo dhulka ay ka maamulaan Galmudug.
Mustaqbalka Al-Shabaab oo ku xiran Hirshabelle
Madaxweyne Xasan Sheekh iyo halka ay ka istaagto xoreynta deegaanada Hirshabelle ayaa go’aamin doona mustaqbalka Al-Shabaab ee dalka.
Madaxweyne Xasan Sheekh ayaa sida hadda muuqata, waxa uu tuutaha militariga u xirtay, sidii uu u xoojin lahaa gulufka lagu soo afjarayo Al-Shabaabka Hirshabelle.
📌 Wararka24 – Xog rasmi ah oo faahfaahin degdeg ah
