Wararka24: Guddoomiyaha degmada Dayniile, Cabdiraxmaan Macallin Xuseen, ayaa amar ku bixiyay in la xoojiyo howlgallada lagu sugayo amniga degmada, iyadoo mudnaan gaar ah la siinayo ka hortagga falalka amni-darrada ah ee habeenkii saameeya shacabka.
Guddoomiyaha ayaa sheegay in ilaalinta nafta, hantida iyo badqabka shacabka ay tahay waajibka ugu horreeya ee maamulka degmada iyo hay’adaha amniga ee ka howlgala Dayniile.
Wuxuu faray ciidamada inay dardargeliyaan howlgallada ka dhanka ah kooxaha burcadda ah, isla markaana si degdeg ah uga jawaabaan cabashooyinka iyo xogaha ay bulshada la wadaagto.
Amarka cusub ayaa si gaar ah u beegsanaya kooxaha ku lugta leh dhaca taleefannada gacanta, lacagaha iyo hantida kale ee qiimaha leh, kuwaas oo inta badan adeegsada mindiyo iyo hub fudud.
“Amniga shacabka waa mas’uuliyad wada saaran maamulka iyo hay’adaha amniga. Waa in si mideysan looga hortagaa cid kasta oo carqalad ku ah nabadda, kala dambeynta iyo xasilloonida degmada,” ayuu yiri Guddoomiyaha degmada Dayniile.
Cabdiraxmaan Macallin Xuseen ayaa sidoo kale digniin u diray ciidamada amniga, isagoo ka mamnuucay inay habeenkii ridaan rasaas aan loo baahnayn. Wuxuu sheegay in rasaasta aan sababta lahayn ay cabsi ku abuurto shacabka isla markaana ay dhaawaceyso kalsoonida bulshada ay ku qabto ciidamada.
Guddoomiyaha ayaa carrabka ku adkeeyay in hubka la adeegsan karo oo keliya marka ay jirto xaalad amni oo dhab ah, iyadoo la ilaalinayo badqabka dadka rayidka ah iyo xasilloonida xaafadaha degmada.
Maamulka Dayniile ayaa ugu baaqay shacabka inay si dhow ula shaqeeyaan ciidamada amniga, ayna la wadaagaan xog kasta oo la xiriirta kooxaha burcadda ah, falalka amni-darrada iyo dhaqdhaqaaqyada laga shakiyo.
Waxa uu maamulka sheegay in iskaashiga bulshada iyo hay’adaha amniga uu yahay tiirka ugu muhiimsan ee lagu xaqiijin karo nabadgelyo iyo xasillooni waarta.
