Wararka24: Maamulka Madaxweynaha Mareykanka Donald Trump ayaa dib u soo celinaya Sharcigan loo yaqaan “public charge”, taas oo u oggolaan karta dowladda inay diiddo codsiyada Green Card-ka ee dadka isticmaala qaar ka mid ah adeegyada iyo kaalmada bulshada ee dowladda.
Siyaasaddan ayaa Khamiistii lagu soo bandhigay diiwaanka rasmiga ah ee dowladda federaalka, waxaana la qorsheeyay in si rasmi ah loo daabaco 20-ka July, halka Hay’adda Adeegyada Jinsiyadda iyo Socdaalka Mareykanka (USCIS) ay sheegtay inay dhaqan geli doonto 18-ka September.
Marka sharcigan uu hirgalo, dadka codsanaya deggenaanshaha joogtada ah waxaa laga doonayaa inay caddeeyaan inay awood u leeyihiin inay naftooda dhaqaale ahaan masruufaan, isla markaana aysan noqon doonin culeys ku yimaada dowladda. sharcigan waxuu saamayn karaa dadka isticmaala barnaamijyada ay ka mid yihiin kaalmada cuntada, Medicaid, guryaha la kabo iyo adeegyo kale oo dowladda bixiso.
Sharcigan ayaa markii ugu horreysay la hirgeliyay sannadkii 2020 xilligii maamulka koowaad ee Trump, balse waxaa meesha ka saaray maamulkii Madaxweyne Joe Biden. Hadda maamulka Trump ayaa dib u soo celinaya iyadoo qayb ka ah qorshihiisa lagu adkeynayo siyaasadaha socdaalka.
USCIS ayaa sheegtay in tallaabadan ay dib u xaqiijinayso mabda’a isku-filnaanshaha dhaqaale ee muhaajiriinta, isla markaana lagu ilaalinayo hantida dadweynaha. Hay’addu waxay sheegtay in dadka u soo guuraya Mareykanka laga doonayo inay awood u yeeshaan inay naftooda masruufaan halkii ay ku tiirsanaan lahaayeen taageerada dowladda.
Dadka u dooda xuquuqda muhaajiriinta ayaa dhaliilay dib u soo celinta siyaasaddan, iyagoo sheegay inay saameyn ku yeelan karto qoysas badan oo sharci ku jooga Mareykanka. Waxay sidoo kale ka digeen in cabsi laga qabo saameynta Green Card-ku ay keeni karto in dad badan ay ka fogaadaan adeegyada caafimaadka iyo kaalmooyinka ay sharci ahaan xaqa u leeyihiin.
Dib u soo celinta Sharcigan ayaa kusoo aadeysa xilli maamulka Trump uu sii adkeynayo sharciyada socdaalka, iyadoo tallaabadan ay saameyn ku yeelan karto kumannaan qof oo doonaya inay helaan deggenaanshaha joogtada ah ee Mareykanka.
