Wararka24: Xulalka qaranka Spain iyo France ayaa caawa oo Talaado ah 14-ka July isaga hor imanaya ciyaarta semi-finalka Koobka Adduunka, kulan si weyn isha loogu hayo maadaama ay yihiin laba ka mid ah xulalka ugu awoodda badan Yurub.
Spain, oo ku guuleysatay Koobka Adduunka sanadkii 2010, ayaa tartankan kusoo bandhigtay qaab ciyaareed deggan oo ku dhisan difaac adag, kubad-heysasho iyo nidaam kooxeed. Xulka ayaa ilaa hadda laga dhaliyay hal gool oo keliya, taasoo muujinaysa awooddiisa dhanka difaaca.
Dhanka kale, France oo ku guuleysatay Koobka Adduunka 2018 isla markaana gaartay finalkii tartankii ugu dambeeyay, ayaa markale muujisay awooddeeda weerar. Weerarka xulka oo uu hoggaaminayo Kylian Mbappé ayaa loo arkaa mid ka mid ah kuwa ugu halista badan tartanka.
Falanqeeyayaal badan ayaa aaminsan in kulankan uu noqon doono isku dhac u dhexeeya weerarka xooggan ee France iyo difaaca adag ee Spain. France ayaa ku tiirsan weerarro degdeg ah iyo xirfadaha ciyaartoydeeda, halka Spain ay isku dayi doonto inay ciyaarta ku maamusho kubad-heysasho iyo dulqaad.
Natiijada kulankan ayaa go’aamin doonta xulka u gudbi doona finalka Koobka Adduunka, iyadoo taageerayaasha kubadda cagta dunida oo dhan ay si weyn u sugayaan kulanka caawa.
Sidhookale Xulalka qaranka Argentina iyo England ayaa berri isaga hor imanaya ciyaarta labaad ee semi-finalka Koobka Adduunka, kulan si weyn isha loogu hayo maadaama uu xambaarsan yahay taariikh dheer iyo tartan adag oo u dhexeeya labada dal.
Argentina, oo ah kooxda difaacaneysa horyaalka, ayaa doonaysa inay sii waddo safarkeeda kuna guuleysato finalka, halka England ay rajaynayso inay soo afjarto sugitaan dheer oo ku aaddan hanashada Koobka Adduunka, iyadoo markii ugu dambeysay ku guuleysatay tartanka sanadkii 1966.
