Wararka24: Golaha Mustaqbalka Soomaaliyeed ayaa soo bandhigay hindise cusub oo loogu magac daray Transitional Direct Elections Model 2026 (TDEM), kaas oo lagu sheegay qorshe lagu fududeynayo u gudubka Soomaaliya ee nidaamka doorashooyinka dadban loona jihaynayo doorashooyin ay shacabka si toos ah ugu codeeyaan wakiilladooda.
Sida ku cad hindisaha, muwaadiniinta Soomaaliyeed ayaa markii ugu horreysay si toos ah u dooran doona xubnaha Baarlamaanka Federaalka iyo baarlamaannada dowlad-goboleedyada, iyadoo inta lagu jiro marxaladda kala guurka la sii ilaalinayo nidaamka awood-qaybsiga ee 4.5.
Golaha Mustaqbalka ayaa sheegay in qaabkan uu isku dheellitirayo baahida loo qabo doorashooyin dadweyne iyo xaaladaha siyaasadeed ee dalka, si looga fogaado khilaaf ka dhasha isbeddel degdeg ah.
Qorshahan ayaa sidoo kale soo jeedinaya in codbixiyeyaashu ay isdiiwaangelin karaan isla maalinta doorashada, taas oo meesha ka saaraysa baahida diiwaangelin muddo dheer socota. Kadib diiwaangelinta, qof kasta ayaa hal cod u dhiibanaya musharraxa kursiga uu doonayo, waxaana kursiga ku guuleysanaya musharraxa hela codadka ugu badan.
Hindisaha wuxuu dhigaya in marxaladda kala guurka aysan doorashooyinka ka qayb geli doonin xisbiyo siyaasadeed. Halkii ay xisbiyadu door ku yeelan lahaayeen, waxaa sii jiri doona nidaamka qoondaynta kuraasta ee hadda jira, iyadoo odayaasha dhaqanka ay sii wadi doonaan doorkooda ku aaddan qoondaynta kuraasta beelaha iyo beel-hoosaadyada si loo ilaaliyo isu dheellitirka siyaasadeed.
Golaha Mustaqbalka Soomaaliyeed ayaa ku tilmaamay TDEM xal ku meel gaar ah oo kor u qaadi kara ka qaybgalka shacabka isla markaana dhisi kara kalsoonida loo baahan yahay si mustaqbalka loogu gudbo doorasho buuxda oo qof iyo cod ah. Hindisahan ayaa kusoo beegmaya xilli ay weli socdaan doodaha u dhexeeya Dowladda Federaalka, dowlad-goboleedyada iyo saamileyda siyaasadda ee ku saabsan hannaanka doorashooyinka Soomaaliya ee sanadka 2026.
