Xiisadda u dhexeysa Maraykanka iyo Iiraan ayaa maanta deggan, kaddib laba maalmood oo ay labada dhinac is dhaafsanayeen weerarro culus, iyadoo dadaallo diblomaasiyadeed ay socdaan si dib loogu bilaabo wada-hadallada u dhexeeya Washington iyo Tehran.
Sarkaal ka tirsan dowladda Maraykanka ayaa u sheegay Al Jazeera in Washington ay weli ka go’an tahay in khilaafka lagu xalliyo wadahadal, isla markaana ay socdaan wada-hadallo farsamo oo u dhexeeya labada dhinac si loo yareeyo xiisadda.
Dhanka kale, dagaalladii ugu dambeeyay ayaa saameyn ku yeeshay isu-socodka maraakiibta ganacsiga ee mara marin-biyoodka istaraatiijiga ah ee Hormuz. Wararka ayaa tilmaamaya in dhaqdhaqaaqa maraakiibta uu si weyn hoos ugu dhacay, taasoo walaac ka abuurtay suuqyada tamarta iyo sahayda shidaalka ee caalamka.
Weerarradii dhacay labadii maalmood ee la soo dhaafay ayaa sababay khasaare isugu jira dhimasho, dhaawac iyo burbur hantiyeed, iyadoo gantaallo iyo duqeymo cirka ah lagu beegsaday xarumo ciidan iyo kaabayaal muhiim ah oo ku yaalla gudaha Iiraan iyo qaar ka mid ah dalalka gobolka.
Khubarada dhaqaalaha ayaa ka digaya in haddii xiisaddu dib u soo cusboonaato ay saameyn ballaaran ku yeelan karto suuqyada tamarta caalamka, maadaama marin-biyoodka Hormuz uu yahay marin muhiim u ah dhoofinta shidaalka dunida.
Inkastoo xaaladdu maanta deggan tahay, dadaallada diblomaasiyadeed ayaa weli socda, iyadoo dhinacyada iyo dalalka dhexdhexaadinaya ay rajeynayaan in wada-hadalladu horseedaan heshiis lagu yareeyo xiisadda lagana fogaado isku dhac hor leh oo gobolka ka dhaca.
