Wararka24: Ciidamada Uganda ee ka tirsan Hawlgalka Taageerada iyo Xasilinta Midowga Afrika ee Soomaaliya (AUSSOM) ayaa si rasmi ah u soo dhaweeyay taliye ku-xigeen cusub, kadib munaasabad xil wareejin ah oo lagu qabtay xarunta ciidanka ee howlgalka.
Korneyl Jude Rukubya ayaa xilka kala wareegay Korneyl Francis Obita Aragamoi, oo soo gabagabeeyay muddadii uu ka tirsanaa howlgalka AUSSOM ee Soomaaliya.
Munaasabadda xil wareejinta waxaa guddoomiyay Taliyaha Ciidanka Uganda ee AUSSOM, Sareeye Guuto Jackson Kayanja, kaas oo ku ammaanay taliyihii hore doorkii uu ka qaatay howlgalada amniga iyo xasilinta ee laga fuliyay Soomaaliya.
Kayanja ayaa sheegay in hawlgallada loogu magac daray Silent Storm, Hidden Sword iyo Rolling Thunder ay gacan ka geysteen dib u soo celinta iyo sugidda amniga deegaanno dhowr ah oo ay ka mid yihiin Sabiid iyo Canoole, Bariire, Awdheegle, Mubaarak, Daarusalaam, Jariib iyo Dhanaane.
Dhankiisa, Korneyl Francis Obita Aragamoi ayaa uga mahadceliyay hoggaanka ciidamada Uganda kalsoonidii ay siiyeen iyo fursaddii uu ugu adeegay howlgalka Soomaaliya, isaga oo xusay taageerada uu ka helay saraakiisha iyo ciidamada intii uu xilka hayay.
Taliyaha cusub, Korneyl Jude Rukubya, ayaa ballan qaaday inuu sii ambaqaadi doono dadaallada lagu xoojinayo amniga iyo xasiloonida Soomaaliya, isaga oo sheegay in wadajir, anshax iyo xirfad ay saldhig u noqon doonaan howlaha ciidanka Uganda ee ka tirsan AUSSOM.
Howlgalka AUSSOM ayaa door muhiim ah ka qaata taageerada ciidamada amniga Soomaaliya iyo dadaallada lagu xoojinayo xasilloonida dalka, iyadoo ciidamada Uganda ay ka mid yihiin kuwa ugu badan ee ku sugan howlgalka Midowga Afrika.
