Wararka24: Dowladda Federaalka Soomaaliya ayaa isbeddel ku sameysay hoggaanka Qeybta 60-aad ee Ciidanka Xoogga Dalka Soomaaliyeed, oo ka howlgasha deegaannada maamulka Koonfur Galbeed. Tallaabadan ayaa ku soo aadeysa xilli gobolka uu wajahayo xaalado amni iyo dhaqdhaqaaqyo ciidan oo sii kordhaya.
Munaasabad lagu qabtay magaalada Baydhabo ayaa xilka si rasmi ah loogu wareejiyay taliyaha cusub ee Qeybta 60-aad, Korneel Isaaq Bardaale. Munaasabadda waxaa ka qeyb galay saraakiil sare oo ka tirsan ciidamada qalabka sida iyo mas’uuliyiin kale oo dowladda ka tirsan.
Taliye ku xigeenka Ciidanka Dhulka ee Xoogga Dalka, Jeneraal Cabdullaahi Xuseen Ciro, ayaa guddoomiyay munaasabadda xil wareejinta. Wuxuu taliyaha cusub ku boorriyay inuu dardargeliyo howlgalada ka dhanka ah Al-Shabaab isla markaana kor u qaado wada shaqeynta ciidamada ka howlgala deegaannada Koonfur Galbeed.
Jeneraal Ciro ayaa sheegay in dowladda ay muhiimad gaar ah siinayso xoojinta amniga iyo howlgallada militari ee socda. Wuxuu tilmaamay in taliska cusub laga sugayo dadaal dheeraad ah oo lagu xaqiijinayo xasilloonida iyo badqabka shacabka ku nool gobollada maamulkaas.
Magacaabistan ayaa timid xilli maalmihii la soo dhaafay deegaanno ku dhow Baydhabo ay ka dhaceen dagaallo sababay khasaare kala duwan. Wararka laga helayo goobahaas ayaa sheegaya in iska horimaadyadu ay ku lug lahaayeen dagaalyahanno ka tirsan Al-Shabaab iyo kooxo kale oo hubeysan.
Sidoo kale, ilo kala duwan ayaa sheegay in dagaalladaasi ay sababeen dhimasho iyo dhaawac soo gaaray qaar ka mid ah ciidamada dowladda. Si kastaba, faahfaahin rasmi ah oo ku saabsan khasaaraha guud weli si buuxda looma shaacin.
Dowladda Federaalka ayaa xilligan wada qorshayaal lagu xoojinayo amniga Koonfur Galbeed, iyadoo sidoo kale la filayo in maamulkaasi ay ka dhacaan isbeddello siyaasadeed iyo doorashooyin la xiriira hoggaanka mustaqbalka ee maamulka.
