Wararka24: Xildhibaan Cabdiraxmaan Cabdishakuur Warsame oo kamid ah hoggaamiyeyaasha mucaaradka Soomaaliya ayaa ku eedeeyay Madaxweyne Xasan Sheekh Maxamuud inuu abaabulayo ciidamo cusub oo uu sheegay in loogu talagalay caburinta mucaaradka iyo xoojinta awoodda siyaasadeed ee Villa Soomaaliya.
Cabdiraxmaan Cabdishakuur oo ka hadlay shir ay mucaaradku ku yeesheen Muqdisho ayaa sheegay inay hayaan xog la xiriirta ciidamo lagu tababaray gobollada dhexe iyo guutooyin kale oo uu sheegay inay ku xareysan yihiin xarumaha ciidamada ee TurkSom.
“Waxaan ognahay in Xasan Sheekh uu wado abaabul ciidan, waxaan ognahay ciidamo lagu tababaray gobollada dhexe iyo guutooyin cusub oo uu doonayo inuu soo saaro,” ayuu yiri Cabdiraxmaan Cabdishakuur Warsame.
Sidoo kale, wuxuu ku eedeeyay Madaxweynaha inuu doonayo inuu ciidamada u adeegsado dano siyaasadeed iyo cadaadis ka dhan ah mucaaradka. Wuxuu sheegay in mucaaradku aysan ka baqeyn awood ciidan, isla markaana ay sii wadi doonaan mowqifkooda siyaasadeed.
Ra’iisul wasaarihii hore ee Soomaaliya Xasan Cali Khayre ayaa isna farriin u diray ciidamada qalabka sida, isaga oo ugu baaqay inay ka fogaadaan wax kasta oo lagu dhibaateynayo shacabka Soomaaliyeed.
Khayre ayaa sheegay in ciidamada loo tababaray difaaca dalka iyo ilaalinta shacabka, balse aysan habboonayn in loo adeegsado khilaafyo siyaasadeed ama dano gaar ah.
Dhanka kale, Villa Soomaaliya weli kama aysan hadlin eedeymaha mucaaradka ee la xiriira abaabulka ciidamada cusub iyo hadallada kasoo yeeray siyaasiyiinta mucaaradka.
Mucaaradka Soomaaliya ayaa sidoo kale iclaamiyay dibad-baxyo ka dhan ah dowladda Federaalka Soomaaliya, kuwaas oo la qorsheynayo inay ka billowdaan magaalada Muqdisho 4-ta June, iyadoo la filayo inay sii socdaan toddobaadyo.
Xiisadda siyaasadeed ee dalka ayaa sii xoogeysaneysa, kadib muranka ka taagan muddo xileedka hay’adaha dowladda iyo hannaanka doorashooyinka dalka.
