Wararka24: Markabka sahminta shidaalka ee Çağrı Bey ayaa ka ambabaxay dekedda Muqdisho, isaga oo u jiheystay ceelka Curad-1 si uu u bilaabo howlaha sahminta shidaalka ee xeebaha Soomaaliya. Tallaabadan ayaa qeyb ka ah iskaashi dhinaca tamarta ah oo u dhexeeya Soomaaliya iyo Turkiga.
Wasaaradda Tamarta ee Turkiga ayaa sheegtay in markabkan uu safarkiisa ka soo bilaabay dekedda Taşucu ee gobolka Mersin, isagoo Muqdisho soo gaaray kaddib safar qaatay in ka badan konton maalmood. Markabka ayaa si rasmi ah loogu soo dhaweeyay caasimadda, iyadoo ay goobjoog ka ahaayeen masuuliyiin sare oo labada dal ah.
Kadib markii la dhameystiray diyaar garowgii farsamo iyo sahayda, markabku wuxuu u dhaqaaqay goobta qodista. Waxaa la socda maraakiib taageero iyo kuwo amni oo ka tirsan ciidanka badda Turkiga, kuwaas oo sugaya badbaadada howlgalka.
Ceelka Curad-1 ayaa ku yaalla meel qiyaastii 372 kiiloomitir u jirta xeebaha Soomaaliya, waxaana la qorsheynayaa in halkaas laga bilaabo qodista marka markabku gaaro. Hawshan ayaa lagu sameyn doonaa qoto dheer oo gaareysa kumannaan mitir.
Mas’uuliyiinta ayaa sheegay in howlgalka sahminta uu socon doono muddo u dhaxeysa lix ilaa sagaal bilood, iyadoo la eegayo xaaladaha cimilada. Waxaa la filayaa in natiijooyinka kasoo baxa ay door weyn ka qaataan horumarinta dhaqaalaha dalka.
Markabkan ayaa leh awood sare oo qodis ah, wuxuuna ka mid yahay maraakiibta casriga ah ee sahminta shidaalka. Socdaalkiisa ayaa maray waddo dheer oo badeed, isagoo ka soo wareegay meelo badan si uu u gaaro Soomaaliya.
Iskaashiga u dhexeeya Soomaaliya iyo Turkiga ayaa la filayaa inuu furo fursado cusub oo dhinaca maalgashiga iyo horumarinta kheyraadka dabiiciga ah, taas oo muhiim u ah mustaqbalka dalka.
