Wararka24: Wafdi heer sare ah oo ka socda Türkiye ayaa la filayaa inay gaaraan magaalada Muqdisho saacadaha soo socda, si ay uga qeyb galaan munaasabad la xiriirta mashruuca sahminta shidaalka Soomaaliya.
Wafdigan waxaa hoggaaminaya Wasiirka Tamarta ee Turkiga Alparslan Bayraktar, waxaana ku wehliya mas’uuliyiin sare oo kale.
Munaasabadda ayaa lagu soo dhoweynayaa markabka sahminta shidaalka ee Çağrı Bey, kaas oo safar dheer kaga yimid koonfurta Turkiga, isla markaana la filayo inuu bilaabo qodista ceelkii ugu horreeyay ee shidaal badeedka Soomaaliya.
Ceelkan oo loo bixiyay Curad ayaa astaan u ah bilowga sahminta shidaalka badda qoto dheer ee dalka, iyadoo la qorsheeyay in howlgalka qodista uu socdo ku dhawaad 288 maalmood.
Mas’uuliyiinta ayaa sheegay in qodista lagu gaari doono qiyaastii 7,500 mitir, taas oo ka mid noqon karta mashaariicda ugu waaweyn ee tamarta dalka laga hirgeliyo.
Howlgalkan waxaa taageeraya maraakiibta ciidamada badda ee Turkiga, waxaana markabka saaran boqolaal khubaro iyo shaqaale farsamo oo ka shaqeynaya mashruuca.
Dowladda Federaalka Soomaaliya ayaa mashruucan ku tilmaamtay mid taariikhi ah oo kor u qaadi kara dhaqaalaha dalka, isla markaana xoojin kara iskaashiga u dhexeeya Soomaaliya iyo Türkiye.
