Wararka24: 21-02-2026 Xiisadda u dhexeysa Mareykanka iyo Iran ayaa gaartay heer xasaasi ah, kaddib markii Madaxweynaha Mareykanka Donald Trump uu ka digay in Washington ay qaadi karto duqeymo xaddidan oo ka dhan ah Iran, xilli wada-hadallo diblomaasiyadeed oo ku saabsan barnaamijka nukliyeerka ay weli socdaan.
Trump ayaa sheegay in ikhtiyaarka milateri uu miiska saaran yahay, inkastoo uu tilmaamay in uu wali tixgelinayo waddooyinka diblomaasiyadeed. Hadalkan ayaa kusoo beegmay iyadoo Washington ay Bariga Dhexe ku daadisay ciidamo iyo qalab milatari oo dheeraad ah, kuwaas oo ay ku jiraan maraakiib dagaal iyo diyaarado.
Dhanka kale, Wasiirka Arrimaha Dibadda Iran, Abbas Araghchi, ayaa sheegay in Tehran ay diyaarinayso qabyo-qoraal heshiis cusub oo la xiriira barnaamijka nukliyeerka, kaas oo la filayo in maalmaha soo socda loo gudbiyo Mareykanka. Wuxuu xusay in Iran ay rajaynayso in wada-hadallo dhab ah ay billaabmaan toddobaad gudihiis, si xal waara loo gaaro.
Mas’uuliyiinta Iran ayaa sheegay in dalkoodu diyaar u yahay diblomaasiyad iyo wada-xaajood, balse ay sidoo kale u diyaar garoobeen is-difaac haddii la qaado tallaabo milatari. Khubaro dhanka amniga ah ayaa ka digay in duqeyn kasta oo ka dhan ah Iran ay kicin karto dagaal ballaaran oo saameeya Bariga Dhexe iyo xasilloonida caalamka.
Sarkaal ka tirsan Aqalka Cad ayaa sheegay in Mareykanku ujeeddadiisu tahay in Iran laga hor istaago inay yeelato hub nukliyeer ah ama awood ay ku tayeeyso Yuraaniyam, arrintaas oo weli ah qodobka ugu weyn ee lagu muransan yahay wada-hadallada socda.
Gudaha Mareykanka, qaar ka mid ah sharci-dejiyeyaasha ayaa muujiyay walaac ku saabsan hadallada Trump, iyagoo sheegay in tallaabo milatari aysan dhici karin oggolaansho la’aan Koongareeska. Xildhibaano ka tirsan labada xisbi ayaa ka digay in duqeyn degdeg ah ay khatar gelin karto nabadda gobolka, isla markaana ay horseedi karto dagaal aan la saadaalin karin cawaaqibkiisa.
Xaaladda ayaa weli kacsan, iyadoo indhaha caalamka ay ku sii jeedaan natiijada wada-hadallada nukliyeerka iyo go’aamada xiga ee ay qaadaan Washington iyo Tehran.
