Wararka24: 18-02-2026 Madaxweynaha Turkiga Recep Tayyip Erdoğan ayaa digniin culus ka diray Addis Ababa, isagoo ka digay in Geeska Afrika, gaar ahaan Soomaaliya, uu isu beddelo goob ay ku tartamaan quwado shisheeye.
Erdoğan ayaa farriintan jeediyay xilli uu booqasho rasmi ah ku joogo caasimadda Itoobiya, halkaas oo uu shir jaraa’id wadajir ah kula qabtay Ra’iisul Wasaaraha Itoobiya Abiy Axmed.
Erdoğan ayaa sheegay in aqoonsiga ay Israa’iil u muujisay Somaliland uusan wax dan ah u ahayn Soomaaliya iyo guud ahaan Geeska Afrika, isagoo carrabka ku adkeeyay in arrintaasi ay sii hurin karto xasaradaha ka jira gobolka.
Wuxuu ku boorriyay dowladaha gobolka in ay xalal u gaar ah ka gaaraan caqabadaha taagan, halkii ay ka oggolaan lahaayeen faragelin dibadeed oo sii murjin karta xaaladda.
Hoggaamiyaha Turkiga ayaa sidoo kale muujiyay doorka Ankara ee dhexdhexaadinta Itoobiya iyo Soomaaliya, isaga oo tilmaamay in wadahadalladaas ay ku socdaan “Hannaanka Ankara.” Wuxuu u mahadceliyay labada dhinac sida ay uga qayb qaateen wadaxaajoodka, isaga oo sheegay: “Marka xasilooni la helo, ma aragno wax caqabad ah oo hortaagan in Geeska Afrika uu gaaro maqaam soo jiita indhaha caalamka, marka la eego fursadaha dhaqaale ee ka jira.”
Erdoğan ayaa mar kale caddeeyay in Turkigu uu ka go’an yahay ilaalinta madaxbannaanida iyo midnimada dhuleed ee dalalka gobolka. Wuxuu si cad u diiday in colaado hor leh ay ka qarxaan deegaanno horeyba ula daalaa-dhacayay qalalaase. “Waxaan doonayaa inaan si gaar ah u adkeeyo mowqifkeenna ku aaddan qaddarinta madax-bannaanida iyo midnimada dhuleed ee dowladaha ku yaalla aagga ay Itoobiya ku taallo,” ayuu yiri, isaga oo intaas ku daray in Turkigu uusan rabin in gobolka mar kale uu galo wareegyo cusub oo colaadeed.
Dhinaca xiriirka dhaqaale, Erdoğan ayaa xusay in in ka badan 200 shirkadood oo Turkish ah ay ka hawlgalaan Itoobiya, kuwaas oo shaqo abuur u sameeyay ku dhowaad 20,000 qof, isla markaana maalgashi dhan $2.6 bilyan geliyay dalkaas. Waxa uu sheegay in shirkadaha qandaraasyada Turkigu ay Itoobiya ka hirgeliyeen mashaariic waaweyn oo ay ka mid yihiin tareenno, warshado, tamar iyo kaabayaal kale.
Booqashada Erdoğan ayaa ku soo beegantay sannad-guuradii 100-aad ee ka soo wareegtay furitaanka safaaradda Turkiga ee ugu horreysay ee Saxaraha ka hooseysa sannadkii 1926.
Labada dhinac ayaa saxiixay heshiisyo cusub oo ku saabsan iskaashiga dhaqaale iyo tamarta, iyadoo kulanka lagu soo gabagabeeyay hadiyad uu Erdoğan guddoonsiiyay Abiy Axmed, gaariga korontada ku shaqeeya ee Turkiga sameeyo ee Togg.
