Wararka24: 16-02-2026; Diyaaradaha dagaalka ee Turkiga nooca F-16 ayaa dabayaaqadii bishii Janaayo sameeyay dhoolatus milateri oo ay dul heehaabeen hawada magaalada Muqdisho.
Saraakiil Turki ah ayaa sheegay in ujeedku yahay ilaalinta danaha Turkiga ee gobolka iyo taageeridda dadaallada dowladda Soomaaliya ee ka dhanka ah Al-Shabaab.
Tallaabadan ayaa kusoo aadeysa kaddib go’aankii Israa’iil ay bishii Diseembar ku aqoonsatay Somaliland, arrin ay Ankara ku tilmaantay mid khatar ku ah midnimada dhuleed ee Soomaaliya.
Khubaro arrimaha caalamiga ah ayaa sheegay in duullimaadyada Turkigu ay fariin dadban u dirayaan Israa’iil, isla markaana ay muujinayaan loollan saameyn oo sii xoogeysanaya.
Falanqeeyayaal kale ayaa ku dooday in inkastoo aan la filayn dagaal toos ah, haddana Turkiga iyo Israa’iil ay mid walba muujinayaan awooddiisa iyo saameyntiisa gobolka, xilli ay horey u jireen khilaafaad la xiriira Gaza iyo taageerada ay Ankara siiso Xamaas.
Xiisaddan ayaa ka tarjumaysa tartan istiraatiiji ah oo saameyn ku yeelan kara amniga Geeska Afrika, iyadoo khubaro ay tilmaameen in Mareykanku noqon karo dhinaca keliya ee hoos u dhigi kara xiisadda sii kacaysa.
