Wararka24: 15-02-2026; Dowladda Shiinaha ayaa ku dhawaaqday inay hirgelin doonto nidaam canshuur-dhaaf ah oo lagu fududeynayo badeecadaha ay 53 dal oo Afrikaan ah u dhoofiyaan suuqyada Shiinaha, laga bilaabo 1-da May 2026. Dalalkan waa kuwa Shiinaha la leh xiriir diblomaasiyadeed.
Warbaahinta dowladda Shiinaha ayaa sheegtay in tallaabadan ay qeyb ka tahay xoojinta iskaashiga dhaqaale ee u dhexeeya Shiinaha iyo qaaradda Afrika, iyadoo lagu doonayo in la ballaariyo fursadaha ganacsi ee dalalka Afrika.
Sida lagu sheegay warbixinta, Shiinaha ayaa qorsheynaya inuu dardargeliyo wada-xaajoodyada iyo saxiixa heshiisyo ganacsi oo cusub, isla markaana ballaariyo suuq-geynta badeecadaha Afrika ee loo dhoofiyo Shiinaha.
Tallaabadan ayaa lagu hirgelin doonaa hannaan casri ah oo ay ka mid tahay nidaamka “green channel” oo fududeynaya gelitaanka badeecadaha Afrika suuqyada Shiinaha.
Shiinaha ayaa ah lammaanaha ganacsi ee ugu weyn Afrika, wuxuuna door weyn ku leeyahay maalgelinta mashaariicda kaabeyaasha dhaqaalaha, gaar ahaan dekedaha, waddooyinka, tareennada iyo tamarta, kuwaas oo hoos yimaada hindisaha Belt and Road Initiative.
Canshuur-dhaafka cusub ayaa lagu dabaqi doonaa dhammaan dalalka Afrika marka laga reebo Eswatini, oo ah dalka keliya ee qaaradda ku yaalla ee weli xiriir diblomaasiyadeed la leh Taiwan, oo Shiinuhu u arko qayb ka mid ah dhulkiisa.
Mas’uuliyiinta Shiinaha ayaa sheegay in tallaabadan ay furi doonto fursado dhaqaale oo cusub, korna u qaadi doonto dhoofinta badeecadaha Afrika, xilli dalal badan oo Afrikaan ah ay raadinayaan suuqyo cusub oo ay ku gaarsiiyaan wax-soo-saarkooda.
