Wararka24: 6-02-2026: Booliska Soomaaliya ayaa shaaciyay in ay dhawaan hirgelin doonaan nidaam cusub oo casri ah oo isku xira saldhigyada booliska, Waaxda Dambi-baarista (CID), garsoorka iyo xeer-ilaalinta, si loo dardargeliyo isgaarsiinta iyo wadaagga xogta dambiyada.
Afhayeenka Booliska Soomaaliya, Gaashaanle Dhexe Cabdifitaax Aadan Xasan, ayaa sheegay in nidaamkan uu diiradda saarayo mideynta xogta dambiyada iyo dedejinta habraacyada baarista, isla markaana Dowladda Federaalka ay tababarro siisay shaqaale ka shaqeyn doona hirgelinta mashruuca.
Wuxuu xusay in dowlad saaxiib ah ay ka taageereyso mashruuca, kaas oo maraya marxaladdiisii labaad.
“Waxaa jira nidaam wada-shaqeyn ah oo mideynaya 20 saldhig oo boolis ah oo ku yaalla Gobolka Banaadir, Agaasinka Dambi-baarista CID-da, garsoorka iyo xeer-ilaalinta.
Tababarrada way billowdeen, waxaana la filayaa in nidaamku si rasmi ah u shaqeeyo lixda bilood ee ugu horreeya sanadka 2026,” ayuu yiri afhayeenku.
Sidoo kale, Afhayeenka Booliska ayaa sheegay in la qorsheynayo in CID-da lagu xiro xafiisyada gobollada dalka, si loo dardargeliyo dabagalka iyo soo qabashada eedeysaneyaasha.
Mashruucan ayaa, sida ay sheegeen mas’uuliyiinta ammaanka, lagu doonayaa in lagu xoojiyo hufnaanta nidaamka caddaaladda, lana wanaajiyo la-dagaallanka dambiyada iyo amni-darrada dalka.
Wararka muhimka ah kalasoco WARARKA24
