Wararka24: 6-02-2026:Ra’iisul Wasaaraha Israa’iil, Benjamin Netanyahu, ayaa muujiyay walaac isa soo taraya oo ku aaddan horumarka dhinaca milatariga ee ay sameyneyso Jamhuuriyadda Carbeed ee Masar, isaga oo sheegay in Tel Aviv ay qaadi doonto tallaabooyin ay kula socoto una xakameyso kororka awoodda ciidan ee Qaahira.
Netanyahu ayaa sheegay in Israa’iil iyo Masar ay leeyihiin heshiisyo rasmi ah oo dhigaya xadidaado iyo is-faham dhanka amniga ah, isaga oo carrabka ku adkeeyay in kororka awoodda milatari ee Masar aan loo oggolaan doonin inuu gaaro heer khatar ama cabsi ku abuuraya Israa’iil.
“Ciidanka Masar wuu sii xoogaysanayaa, inkastoo ay naga dhaxeeyaan heshiisyo iyo dano wadaag ah, haddana si dhow ayaan ula soconaynaa arrintan, innagoo ka hortagayna in la dhiso awood milatari oo xad-dhaaf ah,” ayuu yiri.
Ra’iisul Wasaaraha Israa’iil ayaa sheegay in Tel Aviv ay si dhow ula socon doonto horumarka milatari ee Qaahira, isla markaana ay qaadi doonto tallaabooyin lagu ilaalinayo dheelitirka amni ee gobolka.
Mas’uuliyiinta Israa’iil ayaa tilmaamay in arrintani ay ku saleysan tahay ilaalinta danaha amni ee Israa’iil iyo xasilloonida heshiisyada u dhexeeya labada dal.
Masar ayaa bilooyinkii u dambeeyay kordhisay tababarro, qalabayn iyo iskaashi ay la leedahay dalal kala duwan oo ku yaalla Waqooyiga Afrika iyo Bariga Dhexe, taas oo sare u qaadday muuqaalka awooddeeda milatari.
Arrintan ayaa soo jiidatay feejignaan ka timid Israa’iil, xilli labada dal ay sii wadaan xiriirkooda diblomaasiyadeed iyo iskaashiga dhinacyada amniga.
Wararka muhimka ah kalasoco WARARKA24
