Wararka24: 6-02-2026: Hay’adda Sirdoonka iyo Nabadsugidda Qaranka (NISA) ayaa sheegtay in howlgal qorsheysan oo laga fuliyay deegaanka Daniga Baaloow ee Gobolka Shabeellaha Hoose lagu beegsaday sarkaal ka tirsan Al-Shabaab, kaas oo hay’addu ku tilmaantay mas’uul ka ahaa maaliyadda kooxda ee Gobolka Banaadir.
War-saxaafadeed kasoo baxay NISA ayaa lagu sheegay in howlgalka, oo dhacay 27-kii Janaayo, lagu beegsaday Axmed Dhubad Xidig, oo magaciisa afgarashadu ahaa Sheekh Aadan Dheere.
Hay’addu waxay sheegtay in ninkaasi uu ku sugnaa guri ku yaalla deegaanka Daniga Baaloow, halkaas oo ay ku fuliyeen howlgal ay wadeen ciidamo si gaar ah u tababaran.
NISA ayaa sheegtay in ninka la beegsaday uu muddo dheer ka tirsanaa Al-Shabaab, isla markaana horey ugu howlanaa ururinta dhaqaale ee kooxda ee gobollo ay ka mid yihiin Mudug, Galgaduud, Hiiraan iyo Shabeellaha Hoose. Hay’addu waxay intaas ku dartay in howlgalka uu daba socday raadraac muddo socday.
Mas’uuliyiinta NISA ayaa sheegay in howlgalka lagu fuliyay iskaashi dhinaca amniga ah, ayna weli sii socdaan howlgallo lagu beegsanayo xubno ka tirsan Al-Shabaab. Dhanka kale, hay’addu waxay ugu baaqday shacabka inay la wadaagaan hay’adaha amniga wixii xog ah oo la xiriira khataro amni. wixii khatar amni ah ama macluumaad la xiriira Khawaarijta Al-Shabaab/Daacish, la wadaag NISA: 199 / 0770747474 / 0620545454
