Wararka24: 6-02-2026:Shirkadda qaranka batroolka Turkiga (TPAO) ayaa heshiis is-afgarad ah la saxiixatay shirkadda tamarta ee Mareykanka laga leeyahay ee Chevron, si ay uga wada shaqeeyaan sahminta iyo soo-saarka shidaalka iyo gaaska, sida uu shaaciyay Wasiirka Tamarta Turkiga, Alparslan Bayraktar.
Heshiiskan, oo lagu saxiixay magaalada Istanbul, ayaa u gogol xaaraya iskaashi ku saabsan mashaariicda sahminta iyo soo-saarka kheyraadka tamarta, ha noqoto gudaha Turkiga ama masraxyada caalamiga ah.
Wasiirka Tamarta Turkiga ayaa sheegay in Ankara ay hiigsanayso in TPAO loo beddelo shirkad tamareed oo heer caalami ah, isla markaana la kordhiyo awoodda wax-soo-saarka.
Tallaabadan ayaa kusoo aadaysa xilli Turkigu u diyaarinayo hawlgallo sahmin iyo qodis shidaal oo laga fulinayo xeebaha Soomaaliya, kaddib heshiis hore oo dhex maray Ankara iyo Muqdisho oo TPAO siinaya xuquuq sahmin iyo soo-saaris meelo ka mid ah badda Soomaaliya.
Masuuliyiinta Turkiga ayaa sheegay in markab qodis casri ah loo qorsheeyay in loo diro biyaha Soomaaliya si uu u hoggaamiyo hawlaha sahminta.
Dowladda Turkiga ayaa sheegtay in iskaashiga ay la sameyneyso shirkadaha tamarta ee Mareykanka uu qeyb ka yahay yoolkeeda yareynta ku-tiirsanaanta tamarta dibadda laga keeno, iyo soo jiidashada maalgashi iyo farsamooyin casri ah.
Dowladda Federaalka Soomaaliya ayaa dhinaceeda sheegtay in horumarinta kheyraadka badda ay muhiim u tahay kobaca dhaqaalaha dalka, inkasta oo ay weli jiraan caqabado dhanka amniga iyo kaabayaasha dhaqaalaha.
Wararka muhimka ah kalasoco WARARKA24
