Wararka24: 5-02-2026: Guddoomiyihii hore ee Gobolka Hiiraan, Cali Jeyte Cismaan, oo ah la-taliyaha Madaxweynaha Jamhuuriyadda Federaalka Soomaaliya ee abaabulka Macaawisleyda, ayaa beeniyay eedeymo loo jeediyay oo ku saabsan in uu joojiyay mashaariic horumarineed oo ka socday magaalada Baladweyne.
Cali Jeyte ayaa sheegay in eedeymahaasi yihiin dacaayad aan sal lahayn, isla markaana uu wajahayo olole sumcad-dil ah. Qoraal uu soo saaray ayuu ku caddeeyay in uusan ku lug lahayn wax fal ah oo carqaladeynaya horumarka gobolka Hiiraan, isaga oo xusay in uu mar walba taageero u yahay mashaariicda danta guud.
“Aniga shaqsi ahaan dadkayga iyo deegaankayga waxaan u qabaa jacayl, mana ahi qof wax duminaya ama dib-u-dhac ku keena ummadda,” ayuu yiri Cali Jeyte, isaga oo xusay in taariikhdiisa shaqo aysan ku jirin falal noocaas ah.
Hadalka Cali Jeyte ayaa yimid kaddib markii mas’uuliyiin ka tirsan maamulka gobolka Hiiraan ay ku eedeeyeen in uu hor istaagay mashaariic horumarineed oo ka socday Baladweyne.
Mas’uuliyiinta maamulka ayaa sheegay in mashaariic dhowr ah, oo ay ku jiraan waddooyin laami ah oo la bilaabay sanadkii 2022, ay hakad galeen, kaddib warqad lagu sheegay in mashaariicda magaalada la joojiyay.
Guddoomiyaha Gobolka Hiiraan ayaa sheegay in hakinta mashaariicdaasi aysan ku saleysneyn dano guud, isla markaana ay saameyn ku yeelatay horumarka Baladweyne.
Maamulka gobolka ayaa ugu baaqay Dowladda Federaalka Soomaaliya iyo Dowlad-goboleedka Hirshabeelle in ay arrintan si degdeg ah uga soo farageliyaan, si dib loogu bilaabo mashaariicda hakadka galay.
