Wasiirka Xanaanada Xoolaha Dowlad-goboleedka Galmudug ayaa kormeer shaqo ku tegay Suuqa Xoolaha iyo xeryaha barakacayaasha ee magaalada Gaalkacyo, si uu u qiimeeyo xaaladda guud iyo baahiyaha ka jira goobahaasi, sida ay sheegeen mas’uuliyiin ka tirsan maamulka Galmudug.
Intii uu kormeerka ku guda jiray, wasiirku wuxuu la kulmay ganacsatada suuqa xoolaha, odayaal dhaqan iyo qaar ka mid ah dadka barakacayaasha ah, isagoo dhageystay cabashooyinka la xiriira duruufaha nololeed, helitaanka adeegyada aasaasiga ah iyo xaaladda daryeelka xoolaha.
Mas’uuliyiinta la socday wasiirka ayaa sheegay in booqashadan ay qeyb ka tahay dadaallada lagu doonayo in lagu xoojiyo adeegyada la siiyo beeraleyda iyo xoola-dhaqatada, iyo in la dardar-geliyo taageerada loo fidinayo dadka barakacayaasha ah.
Wasiirku wuxuu ballan-qaaday in wasaaraddu ay ka shaqeyn doonto xal u helidda caqabadaha la soo gudbiyay, isla markaana ay la kaashan doonto hay’adaha ku shaqada leh.
Wararka muhimka ah kalasoco WARARKA24
