Wararka24: 5-02-2026:Wararka naga soo gaaraya magaalada Baydhaba ee xarunta Gobolka Baay ayaa sheegaya in saaka mar kale ay dib u qarxeen rabshado hubeysan oo gudaha magaalada ka socda, taas oo gashay maalintii labaad, sida ay sheegeen goobjoogayaal iyo ilo deegaanka ah.
Ilo deegaanka ah ayaa sheegay in iska-horimaadku uu ka billowday agagaarka hoyga Wasiirka Xanaanada Xoolaha, Dhirta iyo Daaqa ee Xukuumadda Federaalka Soomaaliya, Xasan Eelaay, kaddib tallaabo ay qaadeen ciidamo ka tirsan maamulka Koonfur Galbeed.
Wararka ayaa tilmaamaya in labada dhinac ay is-weydaarsadeen rasaas, ayna jiraan khasaare isugu jira dhimasho iyo dhaawac, inkasta oo aan tiro rasmi ah la xaqiijin.
Wasiir Xasan Eelaay, oo la hadlay warbaahinta maxalliga ah, ayaa sheegay in gurigiisa la beegsaday, isaga oo mas’uuliyadda dusha ka saaray Madaxweynaha Koonfur Galbeed, Cabdicasiis Laftagareen, arrintaas oo uu ku sheegay mid salka ku haysa khilaaf siyaasadeed oo u dhexeeya dhinacyada.
Ilo warbaahineed ayaa soo sheegay in xiisaddu ay salka ku hayso muran la xiriira dhul ku yaalla aagga xoolaha ee Baydhaba. Xaaladda amni ayaa weli kacsan, waxaana aan weli wax war rasmi ah ka soo bixin saraakiisha amniga ee Koonfur Galbeed. Dhinaca kale, waxaa jira warar sheegaya in isgaarsiinta meelaha qaar ay go’day.
Rabshadahan ayaa kusoo aadaya xilli Koonfur Galbeed ay wajahayo jawi siyaasadeed oo kacsan, iyadoo la filayo in la qabto doorasho, kaddib markii uu dhammaaday muddo xileedkii Madaxweynaha maamulkaas.
