Wararka24: 4-02-2026: Maryan Qaasim Axmed ayaa loo doortay Guddoomiyaha Guddiga Xuquuqul Insaanka Soomaaliyeed, kaddib doorasho maanta ka dhacday magaalada Muqdisho, sida ay sheegeen xubno ka tirsan guddiga.
Doorashada ayaa u dhexeysay Maryan Qaasim Axmed iyo Cumar Cabdulle Calasow, oo hore ula soo shaqeeyay howlgalka AMISOM, kaas oo hadda loo yaqaan AUSSOM. Codeyn ay sameeyeen sagaalka xubnood ee guddiga ayaa Maryan Qaasim ku heshay shan cod, halka Cumar Cabdulle Calasow uu helay afar cod.
Maryan Qaasim, oo hore xilal kala duwan uga soo qabatay dowladihii dalka soo maray, ayaa khudbad ay ka jeedisay goobta doorashada ku sheegtay in ujeeddadeedu tahay u adeegidda bulshada, isla markaana aysan xilka u raadin dan gaar ah. Waxay tiri: “In aan isku sharaxo xilka Guddoomiyaha, igama ahan xil jacayl… waxaan leeyahay qibrad dhowr iyo 40 sano ah, saddex mar ayaan noqday wasiir, hay’ado caalami ahna waan kasoo shaqeeyay.”
Waxay sidoo kale tiri: “Aniga wax kambeyn ah xitaa ma gelin oo hotel ayaan iska deganaa… dadka ii codeeyay ma garanayo, kulligiinna waad mahadsan tihiin.”
Dhanka kale, xilka Guddoomiye Ku-xigeenka Guddiga Xuquuqul Insaanka ayaa loo doortay Maxamed Haaruun Maxamuud, kaas oo helay siddeed cod, sida ay sheegeen xubnaha guddiga.
Dhismaha Guddiga Xuquuqul Insaanka Soomaaliyeed ayaa kusoo beegmaya xilli Soomaaliya ay dhawaan kala wareegtay Qaramada Midoobay mas’uuliyadda maareynta arrimaha xuquuqda aadanaha ee dalka, iyadoo la filayo in guddigu door muuqda ka qaato kormeerka iyo ilaalinta xuquuqda muwaadiniinta.
Wararka muhomka ha kalasoco WARARKA24
