Ra’iisul Wasaaraha Xukuumadda Federaalka Soomaaliya, Xamsa Cabdi Barre, ayaa maanta xarigga ka jaray waddo casri ah oo dhererkeedu yahay ku dhowaad laba kiiloomitir, taas oo laga hirgeliyay degmada Wadajir, gaar ahaan xaafadda Buulo Xuubey ee magaalada Muqdisho.
Waddadan oo ah mid si buuxda loo dhisay, ayaa qeyb ka ah dadaallada xukuumadda Dan-Qaran ay ku horumarinayso kaabayaasha muhiimka ah ee caasimadda. Ra’iisul Wasaaruhu wuxuu xusay in mashruucan uu muujinayo isbeddelka ka jira dhismaha waddooyinka Muqdisho, loogana golleeyahay in la helo kaabayaal tayo leh oo waara, una adeega shacabka muddo dheer.
Waddadan ayaa la dhagax-dhigay 4-tii November 2025, waxaana lagu hirgeliyay muddo saddex bilood gudahood ah, iyadoo loo dhisay qaab casri ah oo leh tayo sare. Ra’iisul Wasaaraha ayaa sheegay in horumarinta kaabayaasha dhaqaalaha ay tahay tiir muhiim u ah kobaca dhaqaalaha, fududeynta isku socodka, qurxinta bilicda magaalada iyo xoojinta amniga caasimadda.
Sidoo kale, Ra’iisul Wasaaruhu wuxuu tilmaamay in waddadan ay door weyn ka qaadan doonto isbeddelka muuqaalka degmada Wadajir, isaga oo xusay in toban sano ka hor aan la filayn in xaafaddan ay gaarto heerkan horumarineed. Wuxuu uga mahadceliyay maamulka Gobolka Banaadir iyo shacabka doorkii ay ka qaateen hirgelinta mashruuca.
Ugu dambeyn, Ra’iisul Wasaaraha ayaa ugu baaqay shacabka deegaanka inay ilaashadaan amniga, bilicda iyo hantida danta guud, isla markaana ay ka shaqeeyaan cagaarinta iyo qurxinta waddooyinka. Waxa uu sidoo kale sheegay in xukuumadda Dan-Qaran ay sii wadi doonto hirgelinta mashaariic horumarineed oo wax ka beddelaya nolosha shacabka, kana dhigi doona Muqdisho caasimad casri ah oo si xawli ah u kobceysa.
