Wararka24: 3-02-2026:Ra’iisul Wasaaraha Xukuumadda Federaalka Soomaaliya, Xamsa Cabdi Barre, ayaa ku tilmaamay caasimadda Muqdisho inay tahay “mid ka mid ah caasimadaha ugu ammaansan dunida,” hadal uu jeediyay xilli uu ka hadlayay xaaladda guud ee amniga dalka iyo doorka ay ku leedahay caasimaddu.
Ra’iisul Wasaaruhu wuxuu sheegay in qaar ka mid ah siyaasiyiinta mucaaradka iyo hoggaamiyeyaasha maamul-goboleedyada ay weli ku xayiran yihiin xusuustii amni-darradii iyo rabshadihii hore ee Muqdisho, isaga oo carrabka ku adkeeyay in xaaladda amni ee caasimaddu ay si weyn isu beddeshay sannadihii u dambeeyay.
Hadalkan ayaa imanaya maalmo kaddib markii diyaaradihii siday ciidamo amni oo ka tirsanaa ilaalada Madaxweynaha Puntland iyo Madaxweynaha Jubaland loo diiday inay ka soo degaan Muqdisho, iyagoo ku soo jeeday shir lagu waday in diiradda lagu saaro wadahadallo la xiriira arrimaha doorashooyinka ee u dhexeeya Dowladda Federaalka iyo maamul-goboleedyada.
Mas’uuliyiin ka tirsan dowladda federaalka ayaa sheegay in ciidamadaasi ay wateen hub culus iyo tiro ka baxsan habraacyada caadiga ah ee amniga, taas oo ay ku tilmaameen khatar amni oo ku wajahan caasimadda, isla markaana aan waafaqsanayn nidaamka amniga qaranka.
Dhanka kale, hoggaamiyeyaasha mucaaradka iyo mas’uuliyiinta Puntland iyo Jubaland ayaa si cad u diiday sheegashadaas, iyagoo ku adkeeyay in arrintu aysan salka ku hayn amni, balse ay la xiriirto kalsooni darro siyaasadeed. Waxay sheegeen in aysan ku kalsoonayn hay’adaha amniga ee hoos yimaada Dowladda Federaalka, iyagoo tusaale u soo qaatay dhacdooyin hore oo aan weli xal laga gaarin.
