Waxaa maanta magaalada Gaalkacyo lagu fuliyay xukun qisaas ah oo ay Maxkamaddu ku ridday Hodan Maxamuud Diiriye, oo lagu helay dambiga dilka gabadh yar oo lagu magacaabi jiray Saabiriin Saylaan Cabdile, taas oo la sheegay inay gurigeeda la joogtay xilligii uu falkaasi dhacay.
Wararka laga helayo Gaalkacyo ayaa sheegaya in xukunka qisaasta ah la fuliyay saaka, kaddib markii uu dhammaaday hannaankii sharci ee kiiska, islamarkaana ay Maxkamaddu horey u xaqiijisay dambiga lagu eedeeyay.
Saabiriin Saylaan ayaa geerideedu si weyn u taabatay bulshada deegaannadaas.
Kiiskan ayaa intii uu socday sababay falcelin ballaaran, gaar ahaan haweenka ku nool Gaalkacyo iyo deegaannada ku dhow.
kuwaas oo marar kala duwan isugu soo baxay mudaharaadyo ay ku dalbanayeen in Saabiriin Cadaalad hesho, ayna Maxkamaddu si degdeg ah u gaarto go’aan cad.
Mas’uuliyiinta laamaha caddaaladda ayaa sheegay in xukunka la fuliyay kaddib marka la hubiyay dhammaan shuruudaha shareecada iyo sharciga dalka, iyagoo xusay in qisaastu ay tahay xuquuq ay leeyihiin ehelka marxuumadda, isla markaana lagu dhaqmay sida uu qabo xeerka.
