Wararka24: 28-01-2026:Baaritaan ay samaysay warbaahinta Finland ee Yle ayaa daaha ka qaaday in waalidiin Soomaaliyeed oo ku nool dalka Finland ay carruurtooda u diraan xerooyin loo yaqaan “dhaqan-celin” oo ku yaalla Soomaaliya iyo Kenya, halkaas oo dhalinyarada lagu hayo tacaddiyo culus oo isugu jira jirdil, silsilado iyo go’doomin adag.
Baaritaanka, oo uu sameeyay wariye Wali Xaashi kana tirsan qaybta Af-Soomaaliga ee Yle, ayaa muujiyay in xerooyinkan oo isu muujiya dugsiyo edbin ah ay dhab ahaantii noqdeen goobo lagu xadgudbo xuquuqda aadanaha. Xaashi ayaa si qarsoodi ah isku ekaysiiyay aabbe raadinaya meel uu wiilkiisa geeyo, wuxuuna gudaha u galay xerooyin ku yaalla Muqdisho iyo Kenya.
Sida warbixintu sheegeyso, dhalinyarada ku jirta xerooyinkan waxaa lagu hayaa sariiro lagu silsiladeeyay, waa la garaacaa, waxaana lagu ciqaabaa cunto yari iyo kelinimo dheer. Maamulayaal ka tirsan xerooyinka ayaa qirtay in marka dhalinyarada la keeno timaha laga xiirayo, isla markaana silsilado looga xirayo lugaha haddii ay isku dayaan inay iska caabiyaan.
Waalidiinta carruurta dira ayaa inta badan ku sababeeya tallaabadan cabsi ay ka qabaan daroogo, dambi ama nolol ay u arkaan mid ka fog dhaqanka. Inkasta oo ficilkan loo yaqaan “dhaqan-celin”, haddana baaritaanku wuxuu muujiyay inuu noqday ganacsi faa’iido leh, iyadoo qoysasku bixinayaan boqolaal yuuro bishii.
Warbixinta Yle ayaa sidoo kale tilmaantay in dhalinyaro laga soo diray dalal ay ka mid yihiin Finland, Sweden iyo Denmark lagu arkay xerooyinkan. Qaar ka mid ah dhibbanayaasha ayaa sheegay in waalidiintooda lagu qanciyay talooyin bulsho oo ku saabsan in xerooyinku yihiin xal wanaagsan.
Mid ka mid ah dhibbanayaasha, Jasmin Osman oo ku dhalatay Denmark, ayaa sheegtay in safar loo sheegay fasax uu noqday dabin. Waxay sheegtay in lagu dejiyay diyaarad ku hakaday Soomaaliya, kadibna lagu xiray xero halkaas ku taalla muddo siddeed bilood ah, iyadoo silsilado lagu hayay lana jirdilay.
Wasaaradda Arrimaha Dibadda ee Finland ayaa qirtay inay ogtahay in carruur loo diro xerooyin ku yaalla Soomaaliya iyo Kenya, balse ay adag tahay helitaanka xog faahfaahsan oo ku saabsan kiisaskaasi.
Diblomaasiyiin iyo khubaro la shaqeeya dhibbanayaasha ayaa sheegay in dhalinyaro badan ay la kulmaan dhaawac maskaxeed oo daran, isla markaana ay ku adkaato inay dib ula qabsadaan noloshii ay ka yimaadeen.
Warbixintu waxay muujisay baahida loo qabo in arrintan si furan looga hadlo, loona helo habab lagu taageero dhalinyarada dhibbanayaasha ah, halkii aamusnaan dhaqan ahaan loo arki lahaa xal.
