GAROWE — Wasiirka warfaafinta Puntland Maxamuud Caydiid Dirir ayaa dowladda federaalka ku eedeeyay inay heshiis qarsoodi la gashay Al-Shabaab.
Caydiid ayaa sheegay in Villa Somalia ay heshiiskan la gashay kadib markii ay ku guuldareysatay inay ciidan ahaan ka hortagto kooxda. Wasiirka ayaan wax caddeymo ah soo bandhigin.
“Villa Somalia ayaa heshiis qarsoodi ah la gashay Al-Shabaab,” ayuu yiri Caydiid. Wuxuu intaa ku daray in heshiiskan uu horseeyay in la joojiyo weerar kooxdu ku qorsheynaysay Muqdisho.
Wasiirka ayaa sheegay in xilka laga qaaday Cabdullaahi Sanbaloolshe si loo fududeeyo heshiiskan. Wuxaa uu sido kaloo eedeeyay in DF ay hakisay dagaalkii Macawiisleyda ee Hiiraan.
Dowladda federaalka ayaan weli ka hadlin eedayntan. Al-Shabaab ayaa sidoo kale aamusan. Ma jiraan xog madaxbannaan oo xaqiijinaya sheegashada Garowe
Eedayntan ayaa ku soo beegmaysay xilli xiisado siyaasadeed u dhexeeya Garowe iyo Villa Somalia. Labada dhinac ayaa ku muransan arrimo dastuureed iyo awoodda federaalka.
Dadka falanqeeya arrimaha siyaasadda ayaa sheegay in eedayntan ay sii hurinayso khilaafka u dhexeeya labada dhinac. Waxay ku baaqeen in la helo xal siyaasadeed.
