Qaar kamid ah siyaasiyiinta mucaaradka ah ee Soomaaliya ayaa maanta shir muhiim ah ku yeeshay magaalada Muqdisho, iyagoo ka wada hadlayay xaaladda siyaasadeed ee dalka.
Shirka waxaa ka qeyb galay madaxweynayaal hore, ra’iisul wasaareyaal hore, guddoomiyayaal baarlamaan iyo xubno kale oo caan ka ah siyaasadda dalka. Ujeedada kulanka ayaa ahayd in si qoto dheer looga doodo isbeddelka socda, diyaar garowga doorashooyinka, iyo duruufaha siyaasadeed ee hadda jira.
Madaxweynihii hore Shariif Sheekh Axmed ayaa sheegay in dowladda hadda jirta aysan dheg u siin cabashooyinka shacabka iyo siyaasiyiinta, isagoo xusay in dalku u baahan yahay isfahan, wada hadal iyo ilaalinta nidaamka dastuuri ah.
Ra’iisul Wasaarihii hore Maxamed Xuseen Rooble ayaa dhankiisa sheegay in loo baahan yahay in la xoojiyo midnimada siyaasiyiinta mucaaradka si looga hortago caqabado hor leh, wuxuuna carabka ku adkeeyay in dalku u baahan yahay hanaan doorasho oo hufan.
Sidoo kale, siyaasiga Maxamed Mursal ayaa tilmaamay in dowladda hadda jirta looga fadhiyo inay dhegeysato talooyinka mucaaradka si loo helo xasillooni siyaasadeed iyo kalsooni dadweyne.
Shirkan ayaa la filayaa in uu socdo muddo saddex maalmood ah, iyadoo lagu wado in laga soo saaro war-murtiyeed ay ku jiraan talooyin iyo baaqyo ku wajahan dowladda Federaalka iyo beesha caalamka.
