Ciidamada gaarka ah ee Hay’adda Nabadsugidda iyo Sirdoonka Qaranka (NISA), gaar ahaan kuwa Gaashaan, ayaa howlgal qorsheysan oo habeenkii xalay ka dhacay deegaanka Sabiid ee gobolka Shabeellaha Hoose ku dilay horjooge sare oo ka tirsanaa Al-Shabaab.
Howlgalkan ayaa la sheegay inuu ka dambeeyay xog sirdoon oo muddo la daba socday, taas oo muujisay halka uu horjoogahaasi ku dhuumaaleysanayay. Sidoo kale, ciidamada ayaa la sheegay inay meesha ka saareen xubno kale oo ilaalinayay horjoogaha, kuwaas oo isna lagu dilay weerarka.
Warar ka soo baxay ilaha ammaanka ayaa sheegaya in horjoogahan uu mas’uul ka ahaa weerarro hoobiyeyaal ah oo dhowr jeer lala beegsaday magaalada Muqdisho tan iyo 2023, isagoo door weyn ku lahaa abaabulka weeraradaas.
Dhinaca kale, ciidamada NISA ayaa sidoo kale howlgal duqeyn ah ka fuliyeen deegaanka Ceel-Hareeri ee gobolka Hiiraan, halkaas oo lagu beegsaday saldhigyo ay Al-Shabaab ku leeyihiin. Duqeymahaas oo dhacay inta u dhaxeysay galabtii iyo fiidnimadii shalay ayaa lagu dilay in ka badan 40 xubnood oo ka tirsan kooxda, oo ay ku jiraan horjoogayaal muhiim ah.
Taliska hay’adda NISA ayaa sheegay in howlgallada noocan ah ay yihiin kuwo joogto ah oo lagu bartilmaameedsanayo hoggaamiyeyaasha iyo maleeshiyaadka kooxda Al-Shabaab meel kasta oo ay ku dhuumaaleysanayaan gudaha dalka.
Taliye ku xigeenka NISA ayaa isna lagu soo waramayaa inuu ku sugan yahay aagga howlgalka si uu ula socdo waxqabadka iyo dardargelinta hawlgalada ka dhanka ah kooxda argagixisada.
