Dowladda Federaalka Soomaaliya ayaa wajahaysa su’aalo culus oo ku saabsan sida ay uga falcelisay ama uga aamusay dhaqdhaqaaqyada siyaasadeed, dhaqaale iyo milatari ee ay Imaaraadka Carabtu ka wadaan gudaha Somaaliya, kuwaas oo dadka falanqeeya arrimaha gobolka ay ku tilmaameen kuwo halis ku ah madax-bannaanida dalka.
Muddooyinkii u dambeeyay, Imaaraadka Carabta ayaa xoojiyay saameyntooda gudaha Soomaaliya iyagoo maalgelin xooggan ku sameeyay dekedaha muhiimka ah sida Berbera iyo Boosaaso, tababarna siiyay qaar ka mid ah ciidamada maamul goboleedyada sida Somaliland iyo Puntland.
Tusaale ahaan, shirkadda DP World oo laga leeyahay Imaaraadka ayaa maalgashi weyn ku samaysay dekedda Berbera, halkaas oo ay sidoo kale ka dhisayaan waddo isku xirta gudaha Somaliland iyo Itoobiya. Tani waxay keentay walaac ku saabsan in heshiisyadaasi lagu xadgudbayo madax-bannaanida Soomaaliya, iyadoo aan dowladda Federaalka si rasmi ah uga mid ahayn heshiisyadaas.
Dhinaca kale, Imaaraadka ayaa xiriir milatari la leh Somaliland, waxayna siiyeen taageero muuqata oo ciidan. Waxaa intaas dheer, dowladda Imaaraadka ayaa xiriir gaar ah la leh Itoobiya, oo dhawaan heshiis is-afgarad kula gashay maamulka Somaliland si ay u isticmaasho dekedda Berbera — arrin si weyn uga careysiisay dowladda Soomaaliya.
Si kastaba ha ahaatee, madaxda dowladda dhexe ee Soomaaliya ayaan si cad uga hadlin arrimahaas, taasoo loo fasirtay in ay yihiin kuwo indhaha ka qarsanaya khatarta ay wataan qorsheyaashaas. Qaar ka mid ah siyaasiyiinta mucaaradka iyo falanqeeyeyaasha ayaa sheegay in aamusnaanta dowladda ay dhabar jab ku tahay qaranimada iyo midnimada dhuleed ee Soomaaliya.
Xaaladdan ayaa ku imaaneysa xilli uu gobolka Geeska Afrika yahay mid aad u xasaasi ah, iyadoo waddamo badan ay ku tartamayaan saameynta istaraatiijiga ah ee marin badeedka iyo dekedaha.