Dowladda Turkiga ayaa bilaabeysa dadaallo cusub oo lagu yareynayo saameynta sii kordheysa ee Imaaraadka Carabta ay ku leedahay gudaha Soomaaliya, xilli uu bilaabmay xiriir saddex-geesood ah oo ay Turkigu la yeelatay Muqdisho, Dooxa iyo hadda Riyaad.
Wasiirka Arrimaha Dibadda Turkiga, Hakan Fidan, ayaa booqasho rasmi ah ku tegay magaalada Riyaad, halkaas oo uu kula kulmay dhiggiisa Sacuudiga, Faysal bin Farxaan Al-Sacuud. Kulankan ayaa lagu tilmaamay mid muhiim ah oo lagu dhisayo xiriir cusub oo qotodheer, gaar ahaan dhinacyada difaaca iyo siyaasadda gobolka.
Wararka la helayo ayaa sheegaya in Sacuudigu uu qorsheynayo inuu balaayiin doollar ku maalgeliyo warshadaha difaaca Turkiga, iyadoo labada dal ay isla meel dhigeen inay si dhow uga wada shaqeeyaan arrimaha Suuriya, gaar ahaan dib u furista xiriirka caalamiga ah iyo horumarinta dib-u-dhiska dalkaas.
Sidoo kale, xaaladda cakiran ee Suudaan ayaa qodob muhiim ah ka ahayd kulanka. Turkiga iyo Sacuudiga ayaa ka wada hadlay sidii xal waara loogu heli lahaa dagaalka sokeeye ee dalkaas, iyadoo la ogyahay in kooxda RSF ay adeegsato hub casri ah oo keena khasaare baaxad leh, gaar ahaan weerarada ay ku hayaan Port Sudan.
Dhinaca kale, ilo-wareedyo diblomaasiyadeed ayaa sheegaya in Turkiga uu u arko saameynta Imaaraadka ee Soomaaliya mid halis ku ah xiriirka tooska ah ee uu Ankara la leeyahay Villa Soomaaliya. Sidaa darteed, Turkiga wuxuu xoojinayaa xiriir siyaasadeed iyo amni oo uu la yeesho dowladda federaalka iyo saaxiibadeeda gobolka.
Isbeddelka cusub ee istaraatiijiyadda Turkiga ayaa noqon kara mid beddela saamaynta Imaaraadka oo muddooyinkii ugu dambeeyay si weyn ugu lug lahaa arrimaha gudaha ee Soomaaliya, iyada oo marar badan lagu eedeeyay inay garab siiyaan siyaasiyiin mucaarad ah iyo hoggaamiyeyaal dowlad-goboleedyo.
Waxaa la filayaa in isbeddelkan uu keeno loollan cusub oo ku aaddan cida saameyn ku yeelan doonta masiirka siyaasadeed ee Soomaaliya, iyadoo Turkigu si cad u muujinayo doonistiisa ah inuu noqdo saaxiibka ugu dhow ee Muqdisho.
