Muqdisho: Golaha Shacabka ee Baarlamaanka Federaalka Soomaaliya ayaa maanta si rasmi ah dib uga furmay xarunta Villa Hargeysa, kaddib hakad siyaasadeed oo muddo kooban joojiyay shaqadii baarlamaanka, sababo la xiriiray khilaaf siyaasadeed oo sababay in xildhibaano laga mamnuuco ka qeybgalka fadhiyada rasmiga ah ee baarlamaanka.
Dib u furista kulanka ayaa ka dambeysay heshiis laga gaaray muran siyaasadeed oo hore u jiray, taas oo keentay in 24 xildhibaan — oo isugu jira mucaarad iyo qaar kamid ah wasiirrada xukuumadda — dib loogu oggolaado inay ka qeybgalaan kulamada baarlamaanka.
Xildhibaanadan ayaa horey looga mamnuucay fadhiyada Golaha Baarlamaanka,
Iyadoo lagu eedeeyay inay ku lug lahaayeen mooshinno iyo khilaafyo siyaasadeed oo si gaar ah u taabanayay hoggaanka Golaha Shacabka.
Inkasta oo arrintan ay tilmaamayso isfaham horudhac ah, hadana xiisadda siyaasadeed ee u dhaxeysa Guddoonka Golaha iyo xildhibaanada mucaaradka ah wali way taagan tahay.
Mucaaradku waxay wali ku dheggan yihiin mooshinkii ay horey ugu gudbiyeen Guddoomiyaha Golaha, Sheekh Aadan Maxamed Nuur (Aadan Madoobe), iyaga oo ku eedeeyay hoggaan xumo iyo ku xadgudub xeer hoosaadka baarlamaanka.
Mooshinkaas wali laguma darin ajandaha rasmiga ah ee kulamada Golaha, iyadoo la filayo in jawaabta Guddoonka ay noqoto mid muhiim ah oo go’aamisa jihada uu u dhaqaaqi doono Baarlamaanku maalmaha soo socda.
Warar aan rasmi ahayn oo laga helay qaar kamid ah xildhibaanada ayaa sheegaya in khilaafka wali yahay mid xooggan, balse fadhiga maanta loo arko tallaabo lagu yarayn karo xiisadda, ama ugu yaraan lagu furi karo wadahadallo cusub oo lagu xallin karo is-marin-waaga siyaasadeed ee jira
Wararka24 – Xog rasmi ah oo faahfaahin degdeg ah
