Hay’adda maamusha dhismaha ee Kenya, NCA, ayaa shaacisay magacyada shirkadaha iyo injineerada ku diiwaan gilsan dhismaha ee ku dumay xaafadda Islii ee Nairobi Jimcihii, 23-kii Oktoobar 2026.
Sida ay hay’addu ku sheegtay war qoraal ah oo aan ka soo xiganay Citizen Digital mashruuca waxaa horumarinaysay shirkadda 9th Street Plaza Limited, halka qandaraaslaha dhismaha uu ahaa Stromax Holdings E.A Limited.
Emmanuel Mwangi Maina ayaa diiwaanka ugu qoran naqshadeeyaha mashruuca, halka Joseph Muturi Mugu uu yahay injineerka qaab-dhismeedka.
NCA waxay sheegtay in mashruuca, oo ku yaalla waddada 9-aad ee Islii, degmada Kamukunji, la diiwaangeliyey 30-kii Luulyo 2025.
Shaacinta magacyadan macnaheedu ma aha in shirkadaha ama xirfadlayaasha la magacaabay lagu caddeeyey inay sababeen burburka. Warbixinta hay’addu ma go’aamin sababta uu ku dumay dabaqa ama waxa kalifay, mana soo bandhigin natiijo baaritaan oo cid gaar ah mas’uuliyadda saaraysa.
Hasiyeeshe Hay’addu waxay sheegtay in goobta la xiray, waxaana yimi oo ka howl galaa kooxo ka socota hay’ado kala duwanna oo ay isku dubaridayaan hawlaha samatabbixinta iyo baaritaannada hordhaca ah.
Waxay dadweynaha ka dalbatay inay ka fogaadaan goobta iyo meelaha la go’doomiyey si shaqaalaha gurmadku u gutaan hawshooda.
Hawlgalka samatabbixinta ayaa weli socda, iyadoo dad lagu tuhunsan yahay inay ku hoos jiraan burburka. Hawlgalka waxaa ka qayb qaadanaya dowladda hoose ee Nairobi, ciidamada difaaca Kenya (KDF), hay’adda maareynta masiibooyinka (NDOC) iyo Laanqayrta Cas ee Kenya. Tirada dadka la badbaadiyey iyo kuwa la la’yahay weli si rasmi ah looma xaqiijin.
Islii waa xaafad ganacsi oo ay ku badan yihiin dadka Soomaaliyeed. Sannadkan horraantiisii, xaafaddu waxay ka mid ahayd meelaha ay saameeyeen roobabkii ka da’ay Nairobi.
Sakaja iyo booliska oo ka hadlay mas’uuliyadda
Dhanka kale, barasaabka Nairobi Johnson Sakaja ayaa sheegay in dhismuhu helay oggolaanshaha dowladda hoose, balse aanu haysan shahaadada lagu oggolaado in la isticmaalo. Wuxuu xusay in aan cidna loo oggolayn inay gasho dhisme aan shahaadadaas haysan, xitaa si ku meel gaar ah, sida ay werisay The Standard.
Taliyaha booliska gobolka Nairobi, Issa Mohamud, ayaa sheegay in tallaabo sharci ah laga qaadi karo dadka baaritaanku ku helo dayacaad dembiyeed. Wuxuu caddeeyey in arrintaasi ku xirnaan doonto natiijada baaritaan dhammaystiran, sida ay soo xigatay Citizen Digital.
