Wararka24: Wararka ka imaanaya gobolka Bakool ayaa sheegaya in duqeyn diyaaradeed maanta lagu beegsaday maleeshiyaad ka tirsan Al-Shabaab iyo ciidamo taabacsan Cabdicasiis Xasan Maxamed Laftagareen, kuwaas oo la sheegay inay ku sugnaayeen duleedka degmada Waajid.
Sida ay sheegayaan xogaha hordhaca ah, duqeynta ayaa lala beegsaday goob ay ku sugnaayeen maleeshiyaad iyo ciidamo hubeysan. Hase yeeshee, weli lama xaqiijin khasaaraha dhabta ah ee ka dhashay weerarka, mana cadda tirada dadka ku dhintay ama ku dhaawacmay.
Saraakiil ka tirsan ciidamada militariga Soomaaliya ayaa sheegeen in howlgalka loo fuliyay sidii loo qorsheeyay, isla markaana ay sii wadi doonaan howlgallada ka socda deegaannadaas. Si kastaba, faahfaahin rasmi ah oo ku saabsan bartilmaameedka iyo natiijada duqeynta weli lama helin.
Xaaladda amni ee gobollada Baay iyo Bakool ayaa weli kacsan, iyadoo la soo sheegayo dhaq-dhaqaaqyo ciidan oo ka socda qaybo ka mid ah labada gobol. Dhaqdhaqaaqyadan ayaa ku soo beegmaya xilli ay sii xoogeysanayaan iska horimaadyada la xiriira khilaafka siyaasadeed iyo kan milatari ee ka jira Koonfur Galbeed.
Maalmihii la soo dhaafay, ciidamo taabacsan Laftagareen iyo dhinacyada ka soo horjeeda ayaa ku lug lahaa dhaq-dhaqaaqyo ciidan oo ka dhacay deegaanno kala duwan. Wararka hordhaca ah ayaa sidoo kale sheegaya in ciidamo mucaarad ku ah maamulka Baydhabo ay la wareegeen degmooyin iyo deegaanno dhowr ah, inkastoo faahfaahinta xaaladda goobahaas ay u baahan tahay xaqiijin dheeraad ah.
Xiisadda ka taagan Koonfur Galbeed ayaa la xiriirta loollanka u dhexeeya ciidamada taageersan maamulka Laftagareen iyo kuwa garab ka hela Dowladda Federaalka Soomaaliya. Iska horimaadyada iyo dhaqdhaqaaqyada milatari ayaa sare u qaaday walaaca laga qabo in colaadda ay ku faafto deegaanno kale oo ka tirsan koonfurta Soomaaliya.
Ilaa hadda, lama shaacin khasaaraha rasmiga ah ee duqeynta ka dhacday duleedka Waajid. Waxaa sidoo kale weli la sugayaa faahfaahin rasmi ah oo ku saabsan cidda fulisay weerarka iyo natiijada howlgalka.
