Wararka24: Guddoomiyaha Golaha Shacabka ee Baarlamaanka Federaalka Soomaaliya, Cabdiqaadir Maxamed Nuur (Jaamac), iyo mas’uuliyiin kale ayaa xalay ka qaybgalay munaasabad lagu xusayay dadkii ku dhintay qaraxii 14-kii Oktoobar 2017 ka dhacay Isgoyska Zoobe ee magaalada Muqdisho.
Munaasabadda ayaa waxaa sidoo kale ka qaybgalay Guddoomiyaha Maamulka Gobolka Banaadir ahna Duqa Muqdisho, Xasan Maxamed Xuseen (Muungaab), iyo xubno kale. Dadka isugu yimid goobta ayaa xusay dhibanayaashii ku naf waayay qaraxaas oo ka mid ah weerarradii ugu khasaaraha badnaa ee soo mara Soomaaliya.
14-ka Oktoobar oo loo aqoonsaday maalin qaran
Golaha Shacabka ayaa 10-kii November ee sannadkii hore ansixiyay qaraar lagu dalbanayay in 14-ka Oktoobar loo aqoonsado maalin qaran oo lagu xusuusto dhibanayaasha weerarrada argagixisada, gaar ahaan dadkii ku dhintay qaraxii Zoobe.
Ra’iisul Wasaare Xamse Cabdi Barre oo shalay ka hadlay Muqdisho ayaa sheegay in maalintan sannad kasta loo asteeyo xusuusta dhibanayaasha iyo dib-u cusboonaysiinta go’aanka qaranka ee ka hortagga xagjirnimada rabshadaha wata.
Guddoomiye Jaamac ayaa sheegay in 14-ka Oktoobar ay tahay maalin murugo iyo tiiraanyo ku leh shacabka Soomaaliyeed, isaga oo xusay in xusuusta dadkii ku dhintay qaraxu ay weligeed ku sii jiri doonto quluubta bulshada.
Wuxuu tilmaamay in dadka goobta isugu yimid ay u yimaadeen xusuusta eheladoodii iyo muwaadiniintii ku waxyeelloobay weerarka. Waxa uu sidoo kale sheegay in dagaalka ay kooxaha hubeysan kula jiraan dalka uu weli socdo, isaga oo shacabka ugu baaqay inay sii xoojiyaan dadaallada lagu ilaalinayo amniga.
Guddoomiyaha Golaha Shacabka ayaa ammaanay doorka shacabka Muqdisho iyo guud ahaan dadka Soomaaliyeed ay ku leeyihiin sugidda amniga caasimadda iyo la dagaallanka Al-Shabaab. Wuxuu sheegay in ka-qaybgalka bulshada uu muhiim u yahay dadaallada lagu ilaalinayo nabadda.
Qaraxii Zoobe ee 2017
Qaraxii Zoobe ee 14-kii Oktoobar 2017 ayaa lagu sheegay inuu sababay dhimashada 587 qof, halka in ka badan 300 oo kalena ay ku dhaawacmeen. Munaasabadda xuska ayaa mar kale iftiimisay khasaaraha weyn ee weerarku u geystay qoysas badan iyo bulshada Soomaaliyeed.
Sawirro
