Wararka24: Madaxweyne Ku-xigeenka Mareykanka, JD Vance, ayaa qiray in maamulka Madaxweyne Donald Trump uu ku fashilmay qaabkii uu ula tacaalay baahinta dukumentiyada la xiriira kiiska Jeffrey Epstein, isagoo sheegay in khaladka ugu weyn uu ahaa dhanka isgaarsiinta.
Vance, oo wareysi siiyay barnaamijka Joe Rogan, ayaa sheegay in maamulka uu u arkayay inay habboonayd in dhammaan dukumentiyada la sii daayo hal mar, halkii dib-u-dhacyo iyo sii deyn qaybo-qaybo ah ay dhici lahaayeen. Wuxuu xusay in qaabka loo maareeyay arrintan uu horseeday jahwareer iyo dhaleeceyn.
“Runtii waxaan ku fashilannay dhanka isgaarsiinta ee faylasha Epstein. Taasi waa run,” ayuu yiri Vance. Wuxuu intaas ku daray inuusan aaminsanayn in dib-u-dhacyadaasi ay ka dhasheen isku day lagu qarinayay xog.
Kiiska Jeffrey Epstein ayaa mar kale noqday arrin si weyn looga dooday Mareykanka, kadib markii dib loo dhigay sii deynta dukumentiyo la xiriira baaritaannadii lagu sameeyay ganacsadihii geeriyooday ee lagu helay dambiyada la xiriira ka ganacsiga iyo tacaddiyada galmada.
Baahinta dukumentiyada ayaa timid kadib markii xubno ka tirsan Kongareeska Mareykanka ay ansixiyeen tallaabo ku khasbeysa dowladda inay soo bandhigto faylal badan oo la xiriira kiiska. Wasaaradda Cadaaladda ayaa billowday sii deyntooda bishii Diseembar, hase yeeshee dukumentiyo badan ayaa ahaa kuwo si weyn loo tafatiray.
Dib-u-dhacyada iyo xogaha ka maqnaa dukumentiyada la sii daayay ayaa dhaliyay dhaleeceyn uga timid siyaasiyiin iyo shacabka Mareykanka, kuwaas oo dalbaday in si buuxda loo soo bandhigo dhammaan xogaha la xiriira kiiska Epstein.
