Wararka24: Xiisadda ka taagan Khaliijka ayaa sii xoogeysatay, iyadoo Iran lagu soo warramayo inay gantaallo iyo diyaarado aan duuliye lahayn ku weerartay bartilmaameedyo ku yaalla qaar ka mid ah dalalka Khaliijka, kadib duqeymo uu Mareykanku ka fuliyay gudaha Iran.
Sida ay baahiyeen warbaahinno caalami ah, seeriga digniinta ayaa laga maqlay dalka Baxrayn, halka Wasaaradda Gaashaandhigga Kuweyt ay sheegtay in nidaamyadeeda difaaca cirka ay ka hortageen gantaallo iyo diyaarado aan duuliye lahayn oo kusoo wajahnaa hawadooda.
Wararka ayaa sidoo kale tilmaamaya in qaraxyo laga maqlay deegaanno ku teedsan marin-biyoodka istaraatiijiga ah ee Hormuz, oo ay ku jiraan Bushehr, Chabahar, Bandar Abbas, Sirik, Jask iyo Jasiiradda Abu Musa. Wakaaladaha wararka Iran ayaa sheegay in ugu yaraan hal qof uu ku dhintay weerar ka dhacay magaalada Iranshahr, inkastoo aan si madax-bannaan loo xaqiijin khasaaraha.
Madaxweynaha Mareykanka, Donald Trump, ayaa sheegay in duqeymihii ugu dambeeyay ee ciidamada Mareykanka ay jawaab u ahaayeen weerarro uu ku eedeeyay Iran inay ku qaaday maraakiibta ganacsiga ee maraya marin-biyoodka Hormuz. Dowladda Iran ayaa weli si rasmi ah uga hadlin eedeymahaas.
Dhinaca kale, hoggaamiyihii sare ee Iran, Ali Khamenei, ayaa maanta lagu wadaa in lagu aaso magaaladiisii Mashhad, kaddib markii malaayiin qof ay ka qaybgaleen baroordiiqyo iyo aaska hordhaca ah ee ka dhacay magaalooyinka Najaf iyo Karbala ee Ciraaq.
