Muwaadiniinta 46 dal oo ku yaalla qaaradda Yurub ayaa Imaaraadka Carabta gali kara iyagoon horay u codsan fiiso..
Liiska waxaa ku jira dalalka waaweyn ee Yurub sida Jarmalka, Faransiiska iyo Boqortooyada Ingiriiska, iyo dalal yaryar sida Monaco, San Marino iyo Faatikaan. Waxaa sidoo kale ku jira dalal ku yaalla bariga Yurub iyo kuwii hore ugu jiray Midowgii Soofiyeedka, sida Yukreeyn, Belarus, Moldofa iyo Joorjiya.
Sida uu dhigayo nidaamka hadda jira, muwaadiniintan uma baahna inay safarka ka hor fiiso ka codsadaan safaaradaha ama internetka. Waxay oggolaansho gelitaan ku helaan marka ay soo gaaraan garoomada iyo xuduudaha dalka.
Hase yeeshee muddada loo oggol yahay iskuma eka dhammaan dalalka. Wargeyska Khaleej Times oo soo xiganaya Hay’adda Federaalka ee Aqoonsiga, Dhalashada, Kastamka iyo Amniga Dekedaha (ICP) ayaa sheegay in dalal badan loo oggol yahay ilaa 90 maalmood muddo kasta oo 180 maalmood ah, halka dalal ay ka mid yihiin Ayrlaand, Andorra, Monaco, Faatikaan (Vatican City) iyo Yukreeyn la siiyo 30 maalmood.
Wargeyskaas ayaa intaa ku daray in dadka sidaas ku gala dalka aysan shaqo ka qaban karin, isla markaana qofkii doonaya inuu ka shaqeeyo Imaaraadka uu u baahan yahay fiiso shaqo oo gaar ah.
Waxaa xusid mudan in tani aysan ahayn go’aan cusub. Inta badan dalalka liiska ku jira ayaa muddo ka faa’iideysanayay nidaamkan, waxaana warbaahinta caalamka ay mar kale soo bandhigeen liiska iyagoo ka caawinaya dadka qorsheynaya safarro.
Dadka safar u qorsheynaya ayaa lagula talinayaa inay xaqiijiyaan shuruudaha ugu dambeeyay ee gelitaanka iyagoo la xiriiraya hay’adda ICP ama shirkadda diyaaradda ay la safrayaan ka hor inta aysan ka dhoofin.
