Dowladda Federaalka Soomaaliya ayaa Jimcihii qaaday tallaabo milatari oo ay ku wajahayso culeyska ay Al-Shabaab ku soo saartay deegaanno u dhow magaalada Muqdisho.
Ciidamo ka tirsan kuwa dowladda ayaa la geeyay waddada u dhexeysa magaalooyinka Muqdisho iyo Afgooye, si ay uga hortagaan xubnaha Al-Shabaab ee soo galay halkaasi. Dadka deegaanka ayaa sheegay in ciidamadu bara koontarool cusub ay ka sameysteen waddada dhinaceeda, iyaga oo sidoo kale baaraya gaadiidka maraya.
Arrintan ayaa laga gol-leeyahay in looga hortago xubnaha Al-Shabaab ee mararka qaar yimaada deegaannadaasi, sida ay sheegeen saraakiisha laamaha amniga Soomaaliya.
Dhowaan ayaa sidoo kale deegaannada Ceelasha Biyaha, Lafoole, iyo Xaawo Cabdi lagu arkay xubno ka tirsan kooxda Al-Shabaab, iyaga oo waddada taagan gaadiidka hubinaya.
Al-Shabaabka soo galay Ceelasha Biyaha aya waxa ay demiyeen dhamaan layrarkii ku xirnaa jidadka waaweyn ee deegaanka. Waxay dadka u sheegeen inay si nabad ah ku joogaan deegaanka, mana jirin iska caabin ay xilligaas ciidamada dowladda kala kulmeen.
Xaaladdan soo korortay ayaa cabsi wayn ku keentay dadka deegaanka, waxaana sidoo kale ka dhashay hadal-heyn xooggan oo qabsatay baraha bulshada. Dadku waxay is waydiinayaan sida ay Al-Shabaab ugu suuragashay inay soo gaaraan halkaasi.
Horay, sidaan oo kale, waxay Al-Shabaab u soo gaareen degmada Balcad, oo qiyaastii 35 KM u jirta caasimada, iyaga oo saacado kooban haystay, kadibna isaga baxay.
Culeysyo kale oo Shabeelaha Hoose iyo Dhexe
Dhinaca kale, gobollada Shabeelaha Hoose iyo Shabeelaha Dhexe ayaa waxaa laga dareemay culeys kale oo ay kooxda soo saartay, kadib markii ay la wareegeen deegaanno horay looga saaray. Waxaase haatan soconayo howlgallo culus oo ay wadaan ciidamada dowladda.
Madaxweyne Xasan Sheekh oo ku sugan dagaalka
Madaxweyne Xasan Sheekh ayaa dhankiisa xirtay tuutaha, wuxuuna ku sugan yahay furinta hore ee dagaalka, gaar ahaan degmada Cadale. Isaga oo halkaas ka hoggaaminayo howlgallo milatari, ayay haatan iska kaashanayaan dowladda iyo dadka deegaanka.
Soomaaliya oo u baahan badbaado degdeg ah
Soomaaliya ayaa hadda u baahan badbaado deg deg ah, maadaama Al-Shabaab ay wadaan weerarro is dabajoog ah oo aan horay loo arag. Halka awoodda ciidamada qaranka ay sii dhimayso, waxaa meelaha qaarkood ka jira abaabul yari iyo gaabis dhanka dowladda ah.
📌 Wararka24 – Xog rasmi ah oo faahfaahin degdeg ah
