Ra’iisul Wasaaraha Soomaaliya, Xamse Cabdi Barre, ayaa sheegay inuu soo dhoweynayo wada-hadallada iyo la-tashiyada siyaasadeed ee maalmahan ka socda magaalada Muqdisho, kuwaas oo ay xukuumaddu la yeelanayso siyaasiyiin Soomaaliyeed, oo ay ku jiraan madax hore iyo hoggaamiyeyaal kale, si looga wada tashado arrimaha siyaasadda iyo hannaanka doorashooyinka.
Ra’iisul Wasaaruhu ayaa sheegay in wada-hadalladu ay si wanaagsan ku socdaan, isagoo muujiyay rajo ah in laga gaaro heshiis ay ku wada qanacsan yihiin dhammaan dhinacyada.
“Waxaan rajeynayaa in, haddii Alle idmo, la gaaro heshiis wanaagsan oo loo dhan yahay,” ayuu yiri Xamse Cabdi Barre.
Wuxuu sheegay in dowladda ay ka go’an tahay in khilaafaadka siyaasadeed lagu xalliyo wadahadal, is-afgarad iyo hannaan nabadeed, isagoo xusay inay diyaar u tahay inay sii waddo dadaallada lagu dhisayo isfaham siyaasadeed oo loo dhan yahay.
Ra’iisul Wasaaruhu wuxuu sidoo kale sheegay inuu ku faraxsan yahay aragtida sii kordheysa ee ku aaddan dib-u-habeynta siyaasadda dalka, isagoo carrabka ku adkeeyay in shacabka Soomaaliyeed ay leeyihiin xaqa ay ku dooranayaan hoggaankooda.
Dhanka kale, Xamse Cabdi Barre ayaa ugu baaqay siyaasiyiinta mucaaradka inay dowladda kala shaqeeyaan laba arrimood oo uu ku tilmaamay mudnaan qaran, kuwaas oo kala ah dardargelinta dagaalka lagula jiro Al-Shabaab iyo difaaca midnimada iyo wadajirka Soomaaliya.
Ugu dambeyn, Ra’iisul Wasaaruhu wuxuu muujiyay rajo ah in haddii laga heshiiyo qodobada harsan, Soomaaliya ay u gudbi doonto marxalad siyaasadeed oo horseedda xasillooni, is-afgarad iyo horumar siyaasadeed.
